નવી દિલ્હી:ભારત અને અમેરિકા વચ્ચેના વચગાળાના વેપાર કરારના માળખાએ ભારતીય નિકાસકારો માટે સમૃદ્ધિના નવા દ્વાર ખોલી દીધા છે. આ કરારના અમલીકરણ સાથે જ અમેરિકામાં મોકલવામાં આવતા કુલ ભારતીય માલ સામાનમાંથી લગભગ ૫૦ ટકા હિસ્સો ડ્યુટી-ફ્રી (કર મુક્ત) શ્રેણીમાં આવી જશે. આનો અર્થ એ છે કે ભારતની અંદાજે $૪૪ બિલિયન (આશરે ₹૩.૬ લાખ કરોડ) મૂલ્યની નિકાસ પર હવે અમેરિકામાં કોઈ ટેક્સ લાગશે નહીં.
કેન્દ્રીય વાણિજ્ય મંત્રી પિયુષ ગોયલે પ્રેસ કોન્ફરન્સમાં જણાવ્યું હતું કે, અગાઉ જે $૩૦ બિલિયનની નિકાસ (જેમ કે સ્માર્ટફોન અને ઇલેક્ટ્રોનિક્સ) ડ્યુટી-ફ્રી હતી, તેમાં હવે નવી $૧૪ બિલિયનની નિકાસનો ઉમેરો થશે. ભારત માટે સૌથી મોટી રાહત એ છે કે રશિયન તેલ ખરીદવા બદલ અમેરિકાએ જે ૨૫% વધારાનો દંડ લાદ્યો હતો, તેને એક્ઝિક્યુટિવ ઓર્ડર દ્વારા તાત્કાલિક અસરથી હટાવી લેવામાં આવ્યો છે. આગામી અઠવાડિયે અન્ય એક આદેશ દ્વારા આ ટેરિફ વધુ ઘટાડીને ૧૮ ટકા કરવામાં આવશે.
આ કરારથી રત્ન-આભૂષણો, ઓટો ઘટકો અને ફાર્મા સેક્ટરને બુસ્ટ મળશે. વિમાનના ભાગો, મશીનરી ઘટકો, સામાન્ય દવાઓ અને હીરાને હવે ડ્યુટી-ફ્રી દરજ્જો મળશે. કૃષિ ક્ષેત્રમાં ભારતની શાન ગણાતા મસાલા, ચા, કોફી અને કાજુ જેવી વસ્તુઓ પણ કોઈપણ ટેક્સ વગર અમેરિકાના બજારોમાં પહોંચશે. બદલામાં, ભારતે રશિયા પાસેથી તેલની આયાત ઘટાડીને અમેરિકા પાસેથી ઉર્જા ઉત્પાદનોની ખરીદી વધારવાની ખાતરી આપી છે, જેની અસર અત્યારથી જ દેખાઈ રહી છે.
આ વસ્તુઓ અમેરિકામાં 'ડ્યુટી-ફ્રી' બનશે:
કૃષિ ઉત્પાદનો: મસાલા, નારિયેળ, ચા, કોફી, કાજુ, જામ અને ફળોના રસ.
ઔદ્યોગિક નિકાસ: વિમાનના સ્પેરપાર્ટ્સ, ઓટો કમ્પોનન્ટ્સ, મશીનરી અને પ્લાસ્ટિક ઉત્પાદનો.
લક્ઝરી અને ફાર્મા: રત્નો, હીરા, જેનરિક દવાઓ અને અન્ય ફાર્માસ્યુટિકલ ચીજો.
પેપર અને રબર: કાગળ અને કુદરતી રબર સંબંધિત તમામ ઉત્પાદનો.
 વેપાર સોદાના મુખ્ય આંકડા:
વિગત અંદાજિત મૂલ્ય
કુલ નિકાસ (નાણાકીય વર્ષ ૨૫) $૮૬.૫૧ બિલિયન
નવી ડ્યુટી-ફ્રી નિકાસ $૧૪.૦૦ બિલિયન
કુલ કર-મુક્ત નિકાસ $૪૪.૦૦ બિલિયન
કરાર પર હસ્તાક્ષરની અપેક્ષા માર્ચ ૨૦૨૬