નવી દિલ્હી : ભારત અને અમેરિકા વચ્ચેના દ્વિપક્ષીય વેપાર કરારના પ્રથમ તબક્કાના માળખાની જાહેરાત સાથે જ ભારતીય ગ્રાહકો માટે સારા સમાચાર આવ્યા છે. આ કરાર હેઠળ અમેરિકાથી આવતા વાઇન, સ્પિરિટ્સ, બદામ અને અખરોટ જેવા ડ્રાયફ્રૂટ્સ પર આયાત ડ્યુટી (Import Duty) માં મોટો ઘટાડો કરવામાં આવશે અથવા તેને સંપૂર્ણપણે નાબૂદ કરવામાં આવશે. આ પગલાથી આગામી સમયમાં વિદેશી ડ્રાયફ્રૂટ્સ અને લક્ઝરી ચીજવસ્તુઓના ભાવમાં નોંધપાત્ર ઘટાડો જોવા મળશે.

ખાદ્ય ચીજો અને લક્ઝરી કાર પર રાહત

સંયુક્ત નિવેદન અનુસાર, ભારત અમેરિકન ખાદ્ય અને કૃષિ ઉત્પાદનોની વિશાળ શ્રેણી પરના ટેરિફ ઘટાડવા સંમત થયું છે. આમાં બદામ, પિસ્તા, અખરોટ અને કેટલીક મસૂરનો સમાવેશ થાય છે. એટલું જ નહીં, હાઈ-એન્ડ લક્ઝરી કાર અને મોટરસાઇકલના પ્રેમીઓ માટે પણ ખુશીના સમાચાર છે, કારણ કે આ વાહનો પરની ડ્યુટીમાં પણ છૂટછાટ આપવામાં આવશે. વાણિજ્ય મંત્રી પિયુષ ગોયલે સ્પષ્ટ કર્યું છે કે ભારતે ખૂબ જ "માપાંકિત" (Calibrated) રીતે બજાર ખોલ્યું છે જેથી સ્થાનિક ખેડૂતો અને MSME ના હિતોને નુકસાન ન થાય.

તબીબી સાધનો અને ટેકનોલોજી થશે સસ્તી

આ કરારની સૌથી મોટી અસર આરોગ્ય ક્ષેત્રે જોવા મળશે. હૃદયના રોગો, ડાયાબિટીસ અને ન્યુરો સંબંધિત અમેરિકન દવાઓ તેમજ પેસમેકર, એક્સ-રે વાલ્વ અને કૃત્રિમ સાંધા જેવા તબીબી ઉપકરણો પરની ડ્યુટી ઘટાડવામાં આવશે. આ ઉપરાંત, આઈફોન અને અન્ય માહિતી-સંચાર ટેકનોલોજી (ICT) સાધનો માટેના આયાત લાયસન્સિંગના અવરોધો દૂર કરવામાં આવશે, જેનાથી ડેટા સેન્ટરો અને આઈટી ક્ષેત્રને મોટો વેગ મળશે.

આ વસ્તુઓ ભારતમાં સસ્તી થવાની અપેક્ષા:

· ડ્રાયફ્રૂટ્સ: અખરોટ, બદામ અને પિસ્તા.

· પીણાં: અમેરિકન વાઇન અને સ્પિરિટ્સ.

· ગેજેટ્સ: આઈફોન, સેમિકન્ડક્ટર ચિપ્સ અને મશીનરી.

· આરોગ્ય: પેસમેકર, હિયરિંગ એડ (શ્રવણ સાધન) અને કિંમતી દવાઓ.

· ઓટોમોબાઈલ: અમેરિકન હાઈ-એન્ડ કાર અને સ્પોર્ટ્સ બાઈક્સ.

ભારતને શું મળ્યું?

ભારતમાંથી અમેરિકા નિકાસ થતા મસાલા, ચા, કોફી, કાજુ, કેરી, કેળા અને જામ જેવી અનેક ચીજો પર અમેરિકામાં 'ઝીરો ટેક્સ' (શૂન્ય ટેરિફ) લાગશે. આનાથી ભારતીય નિકાસકારોને અમેરિકાના વિશાળ બજારમાં મોટો ફાયદો થશે. આ ઐતિહાસિક કરાર પર માર્ચના મધ્ય સુધીમાં અંતિમ મહોર લાગશે અને તે જ દિવસથી નવી કિંમતોનો લાભ મળવાનું શરૂ થશે.