લખનૌ:ઉત્તર પ્રદેશમાં ૨૦૨૭ની વિધાનસભા ચૂંટણીના પડઘમ અત્યારથી જ વાગી રહ્યા છે. બહુજન સમાજ પાર્ટીના સુપ્રીમો માયાવતીએ શનિવારે લખનૌમાં પાર્ટીના તમામ જિલ્લા પ્રભારીઓ અને વિધાનસભા પ્રભારીઓની એક મહત્વપૂર્ણ બેઠક બોલાવી હતી. આ બેઠકમાં માયાવતીએ ૨૦૨૭ની ચૂંટણી માટે અત્યારથી જ મેદાનમાં ઉતરી જવાના આદેશ આપ્યા છે. તેમણે ભાજપ પર આકરા પ્રહારો કરતા કહ્યું કે, "કેન્દ્ર અને રાજ્ય સરકાર જનહિતના મુદ્દાઓને બદલે ધર્મ અને જાતિની આડમાં નફરત ફેલાવીને પોતાની રાજનીતિ ચમકાવવામાં મશગૂલ છે."
બેઠક દરમિયાન માયાવતીએ વર્ષ ૨૦૦૭ની જેમ 'દલિત-બ્રાહ્મણ' ગઠબંધન પર ફરીથી ભાર મૂકવાના સંકેત આપ્યા છે. તેમણે જણાવ્યું કે ભાજપના શાસનમાં બ્રાહ્મણ સમાજ પણ ઉપેક્ષિત અને દુઃખી છે. આ ઉપરાંત, માયાવતીએ ચૂંટણી પંચના SIR (Special Intensive Revision) એટલે કે વિશેષ સઘન મતદાર યાદી સુધારણા કાર્યક્રમ વિશે પણ ચર્ચા કરી હતી. તેમણે સ્વીકાર્યું કે આ પ્રક્રિયાને કારણે પાર્ટીના સંગઠનાત્મક કાર્યોમાં થોડો વિલંબ થયો છે, પરંતુ હવે તેને ઝડપથી પૂરો કરવા માટે નવો રોડમેપ તૈયાર કરવામાં આવ્યો છે.
બસપા સુપ્રીમોએ કાર્યકરોને વિરોધી પક્ષોના 'સામ, દામ, દંડ, ભેદ' ના હથકંડાઓથી સાવચેત રહેવા ચેતવણી આપી હતી. તેમણે સ્પષ્ટ કર્યું કે બસપા ૨૦૨૭ની ચૂંટણી કોઈ પણ જોડાણ વગર એકલા હાથે લડશે અને ગરીબો, પછાત વર્ગો, મુસ્લિમ લઘુમતીઓ અને મધ્યમ વર્ગના પ્રશ્નોને વાચા આપશે. માયાવતીએ સંગઠનમાં જરૂરી ફેરફારો કરવાની અને આર્થિક સહયોગ વધારવાની સૂચના પણ આપી છે, જેથી ૨૦૨૭માં ફરી એકવાર યુપીમાં બહુમતી સાથે સરકાર બનાવી શકાય.