કિવ: છેલ્લા ચાર વર્ષથી ચાલી રહેલા વિનાશક યુક્રેન-રશિયા યુદ્ધને ડામવા માટે અમેરિકાના ટ્રમ્પ વહીવટીતંત્રે અત્યાર સુધીનું સૌથી કડક વલણ અપનાવ્યું છે. યુક્રેનના રાષ્ટ્રપતિ વોલોડીમીર ઝેલેન્સકીએ મોટો ખુલાસો કરતા જણાવ્યું છે કે, અમેરિકાએ બંને દેશોને આગામી જૂન મહિના સુધીમાં શાંતિ કરાર પર પહોંચવા માટેની અંતિમ સમયમર્યાદા (Deadline) આપી દીધી છે. જો આ સમયગાળામાં ઉકેલ નહીં આવે, તો અમેરિકા બંને પક્ષો પર સમજૂતી માટે ભારે દબાણ લાવશે.

ઝેલેન્સકીએ પત્રકારોને જણાવ્યું હતું કે, અમેરિકા આ ઉનાળાની શરૂઆત સુધીમાં ગમે તે ભોગે યુદ્ધનો અંત લાવવા માંગે છે. આ માટે ટ્રમ્પ વહીવટીતંત્રે તમામ ઘટનાઓનું એક 'સ્પષ્ટ સમયપત્રક' તૈયાર કર્યું છે. મહત્વની વાત એ છે કે, આ દિશામાં આગળ વધવા માટે અમેરિકાએ આવતા અઠવાડિયે મિયામીમાં પ્રથમ વખત ત્રિપક્ષીય વાટાઘાટો યોજવાનો પ્રસ્તાવ મૂક્યો છે. ઝેલેન્સકીએ આ ભાગીદારીની પુષ્ટિ કરતા સંકેત આપ્યા છે કે યુક્રેન મંત્રણા માટે તૈયાર છે.

જોકે, શાંતિનો આ માર્ગ એટલો સરળ નથી. અબુ ધાબીમાં યોજાયેલી અગાઉની બેઠકો કોઈ પરિણામ વગર પૂરી થઈ હતી, કારણ કે રશિયા ડોનબાસ વિસ્તારમાંથી યુક્રેનિયન લશ્કરને હટાવવાની જીદ પર અડગ છે, જે કિવને મંજૂર નથી. બીજી તરફ, યુદ્ધના મેદાનમાં સ્થિતિ હજુ પણ ગંભીર છે. ગઈકાલે જ ૬ ફેબ્રુઆરીએ રશિયન ડ્રોન હુમલામાં યુક્રેનિયન ઔદ્યોગિક એકમોને નિશાન બનાવવામાં આવ્યા હતા. હવે જોવાનું એ રહેશે કે જૂન મહિના સુધીમાં ટ્રમ્પનું આ 'પીસ પ્લાન' રશિયા અને યુક્રેનને ટેબલ પર લાવી શકે છે કે કેમ.

શાંતિ પ્રસ્તાવના મુખ્ય મુદ્દાઓ:

·         સમયમર્યાદા: જૂન ૨૦૨૬ સુધીમાં યુદ્ધ સમાપ્ત કરવાનો ટાર્ગેટ.

·         મંત્રણાનું સ્થળ: અમેરિકાના મિયામીમાં ત્રિપક્ષીય બેઠક યોજવાની દરખાસ્ત.

·         ટ્રમ્પની ભૂમિકા: બંને પક્ષો પર આર્થિક અથવા રાજદ્વારી દબાણ લાવવાની રણનીતિ.

·         મુખ્ય અવરોધ: ડોનબાસ ક્ષેત્ર પર રશિયાનો દાવો અને યુક્રેનનો અસ્વીકાર.