નવી દિલ્હી:ઉત્તર ભારત સહિત દેશના અનેક ભાગોમાં હવામાન ફરી એકવાર યુ-ટર્ન લેવા જઈ રહ્યું છે. હવામાન વિભાગના જણાવ્યા અનુસાર, વેસ્ટર્ન ડિસ્ટર્બન્સ (પશ્ચિમી વિક્ષેપ) અને ચક્રવાતી પરિભ્રમણ સક્રિય થવાને કારણે ૯ થી ૧૧ ફેબ્રુઆરી દરમિયાન હવામાનમાં મોટો ફેરફાર જોવા મળશે. આ સમયગાળા દરમિયાન પહાડી રાજ્યોમાં ભારે હિમવર્ષા અને મેદાની વિસ્તારોમાં તેજ પવન સાથે વરસાદની આગાહી કરવામાં આવી છે.

 ૯ ફેબ્રુઆરીથી એક નવું વેસ્ટર્ન ડિસ્ટર્બન્સ હિમાલયી ક્ષેત્રને અસર કરશે. જેના કારણે જમ્મુ-કાશ્મીર, લદ્દાખ, હિમાચલ પ્રદેશ અને ઉત્તરાખંડમાં હળવાથી મધ્યમ વરસાદ અને હિમવર્ષા થવાની શક્યતા છે. ખાસ કરીને ૧૦ ફેબ્રુઆરીએ ગાજવીજ, વીજળીના કડાકા અને ૪૦ કિમી પ્રતિ કલાકની ઝડપે તોફાની પવન ફૂંકાઈ શકે છે. ઉત્તર-પશ્ચિમ ભારતમાં આગામી બે દિવસ લઘુત્તમ તાપમાન સ્થિર રહ્યા બાદ તેમાં ૨ થી ૩ ડિગ્રીનો વધારો થશે, જે શિયાળાની વિદાય અને ગરમીની શરૂઆતનો સંકેત છે.
 બંગાળની ખાડીમાં સર્જાયેલા ચક્રવાતી પરિભ્રમણને કારણે દરિયો તોફાની બની શકે છે. હવામાન વિભાગે ૭ થી ૧૨ ફેબ્રુઆરી દરમિયાન દક્ષિણ-પશ્ચિમ બંગાળની ખાડી અને શ્રીલંકાના દરિયાકાંઠાના વિસ્તારોમાં માછીમારોને દરિયો ન ખેડવાની કડક સલાહ આપી છે. જોકે, અરબી સમુદ્ર માટે હાલમાં કોઈ મોટું એલર્ટ જારી કરવામાં આવ્યું નથી. ઉત્તરાખંડના અમુક વિસ્તારોમાં ૮ ફેબ્રુઆરી સુધી વહેલી સવારે અને રાત્રે ગાઢ ધુમ્મસ જોવા મળશે, જેના કારણે વાહનચાલકોને સાવચેત રહેવા જણાવાયું છે.
હવામાન અપડેટ્સ એક નજરે:
• અસર: ૯ થી ૧૧ ફેબ્રુઆરી વચ્ચે જમ્મુ-કાશ્મીર અને હિમાચલમાં હિમવર્ષા.
• પવનની ગતિ: મેદાની વિસ્તારોમાં ૩૦-૪૦ કિમી પ્રતિ કલાકની ઝડપે પવન ફૂંકાશે.
• તાપમાન: ઉત્તર અને મધ્ય ભારતમાં તાપમાન ૨-૩ ડિગ્રી વધશે.
• એલર્ટ: બંગાળની ખાડીમાં માછીમારો માટે ૧૨ ફેબ્રુઆરી સુધી રેડ એલર્ટ.