કુઆલાલંપુર: વડાપ્રધાન નરેન્દ્ર મોદીની બે દિવસીય મલેશિયા મુલાકાતે ભારતની ડિજિટલ શક્તિનો પરિચય કરાવ્યો છે. કુઆલાલંપુરમાં ભારતીય સમુદાયને સંબોધતા પીએમ મોદીએ જાહેરાત કરી હતી કે ભારતની અત્યાધુનિક પેમેન્ટ સિસ્ટમ UPI (યુનિફાઇડ પેમેન્ટ્સ ઇન્ટરફેસ) ટૂંક સમયમાં જ મલેશિયામાં કાર્યરત થશે.

8 થી વધુ દેશોમાં UPI ની ધાક

ભારતનું UPI હવે માત્ર દેશ પૂરતું સીમિત નથી રહ્યું, પરંતુ તે એક વૈશ્વિક બ્રાન્ડ બની ગયું છે. હાલમાં UPI નીચે મુજબના દેશોમાં લાઇવ છે:

• સિંગાપોર, UAE, ફ્રાન્સ
• ભૂટાન, નેપાળ, શ્રીલંકા
• કતાર અને મોરેશિયસ

મલેશિયા આ યાદીમાં જોડાનાર નવો દેશ બનશે. આનાથી ત્યાં રહેતા ભારતીય આઈટી વ્યાવસાયિકો અને ફરવા જતાં પ્રવાસીઓને હવે કરન્સી એક્સચેન્જની ઝંઝટ વિના સીધા જ મોબાઈલથી પેમેન્ટ કરવાની સુવિધા મળશે.

વ્યવહારોમાં રેકોર્ડબ્રેક 28% નો ઉછાળો

NPCI ના તાજેતરના જાન્યુઆરી 2026 ના ડેટા મુજબ, ભારતમાં UPI વ્યવહારોની સંખ્યા વાર્ષિક ધોરણે 28% વધીને 21.70 અબજ પર પહોંચી ગઈ છે. જ્યારે નાણાકીય મૂલ્યની દ્રષ્ટિએ આ આંકડો ₹28.33 લાખ કરોડને આંબી ગયો છે. જે દર્શાવે છે કે ભારત ડિજિટલ ટ્રાન્ઝેક્શનમાં વિશ્વનું નેતૃત્વ કરી રહ્યું છે.

શું છે UPI અને તેના ફાયદા?

UPI (Unified Payments Interface) એ એક એવી રીઅલ-ટાઇમ સિસ્ટમ છે જે બેંક ખાતામાંથી સીધા નાણાં ટ્રાન્સફર કરવાની સુવિધા આપે છે. તમારે એકાઉન્ટ નંબર કે IFSC કોડ યાદ રાખવાની જરૂર નથી, માત્ર QR કોડ સ્કેન કરીને કે UPI ID દ્વારા સેકન્ડોમાં પેમેન્ટ કરી શકાય છે.