કુઆલાલમ્પુર: આંતરરાષ્ટ્રીય રાજનીતિના ફલક પર ભારત પોતાની પકડ મજબૂત કરી રહ્યું છે, જેનો તાજો નમૂનો મલેશિયાના પાટનગર કુઆલાલમ્પુર ખાતે જોવા મળ્યો. વડાપ્રધાન નરેન્દ્ર મોદી અને મલેશિયાના પીએમ અનવર ઇબ્રાહિમ વચ્ચે યોજાયેલી દ્વિપક્ષીય મંત્રણામાં આતંકવાદ સામેની લડાઈને પ્રાથમિકતા આપવામાં આવી હતી. પીએમ મોદીએ સ્પષ્ટ શબ્દોમાં જણાવ્યું હતું કે, વર્તમાન સમયમાં જ્યારે વિશ્વ અસ્થિરતાના દોરમાંથી પસાર થઈ રહ્યું છે, ત્યારે આતંકવાદ જેવી વૈશ્વિક બદીને ડામવા માટે સમાન વિચારધારા ધરાવતા મિત્ર દેશોએ ખભેથી ખભા મિલાવીને ચાલવું અનિવાર્ય છે. આ મુલાકાતે દક્ષિણ-પૂર્વ એશિયામાં ભારતના પ્રભુત્વને નવી ઊર્જા પૂરી પાડી છે.

બંને દેશો વચ્ચેની આ ચર્ચા માત્ર શબ્દો સુધી મર્યાદિત નથી, પરંતુ તેમાં ટેકનોલોજી અને આર્થિક વિકાસના નક્કર રોડમેપની પણ ઝલક જોવા મળી છે. ખાસ કરીને સેમિકન્ડક્ટર, ક્લીન એનર્જી અને મેન્યુફેક્ચરિંગ ક્ષેત્રે ભારત અને મલેશિયા પોતાની ક્ષમતાઓનો સંયુક્ત રીતે ઉપયોગ કરશે. પીએમ મોદીએ નોંધ્યું હતું કે ભારત અને મલેશિયા માત્ર ભૌગોલિક રીતે જ નહીં, પરંતુ સમુદ્રી સીમાઓથી પણ જોડાયેલા પાડોશી છે. આથી દરિયાઈ સુરક્ષા અને સંરક્ષણ ક્ષેત્રે વધતો સહકાર બંને દેશોની આર્થિક સમૃદ્ધિ માટે સુરક્ષા કવચ સમાન સાબિત થશે.

આ ઐતિહાસિક મુલાકાત દરમિયાન સાંસ્કૃતિક જોડાણનો પણ ગુંજારવ જોવા મળ્યો. મલેશિયામાં વસતા આશરે 30 લાખ ભારતીય મૂળના લોકો બંને દેશો વચ્ચે એક ‘લિવિંગ બ્રિજ’ એટલે કે જીવંત સેતુની ભૂમિકા ભજવી રહ્યા છે. પીએમ મોદીએ ભારતીય ડાયસ્પોરાની મુલાકાતને અત્યંત ખાસ ગણાવી હતી અને મલેશિયાના નેતૃત્વ પ્રત્યે ભારતીયોના આદરની સરાહના કરી હતી. મલેશિયામાં જે પ્રકારે ઉષ્માભર્યું સ્વાગત કરવામાં આવ્યું તેનાથી ભારત-મલેશિયાના સંબંધોમાં રહેલી વર્ષો જૂની મિત્રતાની સુવાસ ફરી એકવાર તાજી થઈ છે.

મલેશિયા જ્યારે આગામી સમયમાં ASEAN (આસિયાન) નું અધ્યક્ષપદ સંભાળવા જઈ રહ્યું છે, ત્યારે ભારત માટે આ મિત્રતા વ્યૂહાત્મક રીતે અત્યંત મહત્વની છે. મલેશિયાના વડાપ્રધાન અનવર ઇબ્રાહિમે પણ પીએમ મોદીના વિઝનને આવકારતા જણાવ્યું હતું કે તમામ પડતર મુદ્દાઓ પર બંને દેશોની ટીમો સાથે મળીને કામ કરશે. વેપારથી લઈને ટેકનોલોજી સુધીની આ જુગલબંધી આવનારા સમયમાં એશિયા પેસિફિક ક્ષેત્રમાં શક્તિ સંતુલન જાળવવામાં નિર્ણાયક ભૂમિકા ભજવશે તે નક્કી છે.