નવી દિલ્હી: રશિયાના ઉફા શહેરમાં ભારતીય મેડિકલ વિદ્યાર્થીઓ પર થયેલા જીવલેણ હુમલાએ સમગ્ર દેશમાં ખળભળાટ મચાવી દીધો છે. બશ્કિર સ્ટેટ મેડિકલ યુનિવર્સિટીમાં અભ્યાસ કરતા ચાર ભારતીય વિદ્યાર્થીઓને અજાણ્યા હુમલાખોરોએ છરીના ઘા ઝીંકી ગંભીર રીતે ઘાયલ કરતા તબીબી જગતમાં આક્રોશ ફાટી નીકળ્યો છે. આ દુર્ઘટનાના પગલે ઓલ ઈન્ડિયા મેડિકલ સ્ટુડન્ટ્સ એસોસિએશન (AIMSA) એ રવિવારે સીધો વડાપ્રધાન નરેન્દ્ર મોદીને પત્ર લખીને રશિયામાં વસતા હજારો ભારતીય વિદ્યાર્થીઓની સુરક્ષા સુનિશ્ચિત કરવા ભાવુક અપીલ કરી છે. એસોસિએશને આક્ષેપ કર્યો છે કે આવી ઘટનાઓથી વિદેશમાં ભણવા જતા તેજસ્વી વિદ્યાર્થીઓના જીવન અને ગૌરવ સામે મોટું જોખમ ઉભું થયું છે.

AIMSA એ પીએમ મોદીને મોકલેલા પત્રમાં આ હુમલાની આકરી નિંદા કરતા જણાવ્યું છે કે, ભારતીય વિદ્યાર્થીઓ માનવતાની સેવા કરવાનું સપનું લઈને વિદેશની ધરતી પર જાય છે, પરંતુ તેમની સામે હિંસા અને ભેદભાવના કૃત્યો અસ્વીકાર્ય છે. મેડિકલ છાત્રોના સંગઠને માંગ કરી છે કે ભારત સરકાર રશિયાના સંબંધિત અધિકારીઓ સાથે ઉચ્ચ સ્તરીય રાજદ્વારી વાટાઘાટો કરે અને દોષિતોને સખત સજા મળે તે માટે દબાણ લાવે. પત્રમાં ભારપૂર્વક કહેવામાં આવ્યું છે કે વિદેશમાં અભ્યાસ કરતા વિદ્યાર્થીઓ માટે સુરક્ષા પદ્ધતિઓ મજબૂત બનાવવી એ સરકારની પ્રથમ અગ્રતા હોવી જોઈએ, જેથી કરીને ભવિષ્યમાં આવી દુખદ ઘટનાઓનું પુનરાવર્તન ન થાય.

એસોસિએશને ભારત સરકાર સામે કેટલીક ચોક્કસ માંગણીઓ પણ મૂકી છે, જેમાં વિદેશમાં ભણતા વિદ્યાર્થીઓ માટે સમર્પિત 'કટોકટી હેલ્પલાઇન' શરૂ કરવાનો સમાવેશ થાય છે. પત્રમાં સૂચવવામાં આવ્યું છે કે વિદેશી યુનિવર્સિટીઓ અને ત્યાંની સરકારો સાથે સતત સંકલન સાધવા માટે એક ખાસ દેખરેખ વ્યવસ્થા બનાવવી જોઈએ. AIMSA ના મતે, જે વિદ્યાર્થીઓ ધમકી કે ભેદભાવનો સામનો કરી રહ્યા છે તેમના માટે સ્પષ્ટ એડવાઈઝરી જારી કરવી અત્યંત જરૂરી છે. વિદ્યાર્થી નેતાઓએ પીએમ મોદીના વૈશ્વિક નેતૃત્વ પર વિશ્વાસ વ્યક્ત કરતા આશા જતાવી છે કે ભારત સરકાર અસરગ્રસ્ત વિદ્યાર્થીઓ અને તેમના પરિવારોને એકલા નહીં છોડે.

આ તરફ, રશિયામાં સ્થિત ભારતીય દૂતાવાસ પણ હરકતમાં આવ્યું છે. સોશિયલ મીડિયા પ્લેટફોર્મ X પર પોસ્ટ કરીને દૂતાવાસે પુષ્ટિ કરી છે કે ઉફામાં થયેલા હુમલામાં ચાર ભારતીય વિદ્યાર્થીઓ ઘાયલ થયા છે. કાઝાન સ્થિત ભારતીય કોન્સ્યુલેટના અધિકારીઓને તાત્કાલિક અસરથી ઉફા મોકલવામાં આવ્યા છે જેથી ઘાયલ વિદ્યાર્થીઓને હોસ્પિટલમાં જરૂરી તમામ સહાય મળી શકે. હાલમાં ભારતીય અધિકારીઓ રશિયન પોલીસ અને સ્થાનિક પ્રશાસનના સતત સંપર્કમાં છે. આ ઘટનાએ રશિયામાં અભ્યાસ કરતા હજારો ભારતીય વિદ્યાર્થીઓના વાલીઓને પણ ચિંતામાં મૂકી દીધા છે, અને તેઓ સરકાર પાસે ઝડપી પગલાંની આશા રાખી રહ્યા છે.