બાંદા: ઉત્તર પ્રદેશના બાંદા જિલ્લામાં સોશિયલ મીડિયા પર વાયરલ થવાની આંધળી દોટમાં એક અત્યંત હૃદયદ્રાવક ઘટના સામે આવી છે. ઇન્સ્ટાગ્રામ પર રીલ બનાવીને લોકપ્રિય થવાની લાલચમાં ૨૭ વર્ષની મોહિની નામની મહિલાએ પોતાનો જીવ ગુમાવ્યો છે. બાબેરુ ગામના કરુઇયા પુરવા વિસ્તારમાં બનેલી આ ઘટનાએ સમગ્ર પંથકમાં અરેરાટી ફેલાવી દીધી છે. સામાન્ય રીતે મનોરંજન માટે બનતી રીલ્સ ક્યારેક મોતનો ફાંસો બની શકે છે, તેનો આ જીવતો જાગતો અને ડરામણો કિસ્સો છે.

મૃતક મોહિનીને સોશિયલ મીડિયા પર વીડિયો બનાવવાનો ભારે ક્રેઝ હતો અને તે અવારનવાર અવનવી રીલ્સ અપલોડ કરતી હતી. ૬ ફેબ્રુઆરીની સાંજે જ્યારે તે પોતાના રૂમમાં એકલી હતી, ત્યારે તેણે એક વિશિષ્ટ વીડિયો બનાવવાનું નક્કી કર્યું. આ રીલ માટે તેણે ફાંસી લગાવવાનું નાટક કરવાનું હતું. તેણે રૂમની છતના હુક પર દોરડું બાંધ્યું અને નીચે એક સ્ટૂલ મૂકી તેના પર ઊભી રહી ગઈ. ગળામાં ફાંસો નાખીને તે જેવી એક્ટિંગ કરવા ગઈ કે તરત જ કુદરતને કંઈક બીજું જ મંજૂર હતું.

વીડિયો શૂટિંગ દરમિયાન અચાનક મોહિનીનું સંતુલન બગડ્યું અને સ્ટૂલ પરથી તેનો પગ લપસી ગયો. જે દોરડું અત્યાર સુધી માત્ર શૂટિંગ માટે ગળામાં હતું, તે પગ લપસતાની સાથે જ કાળ બનીને ગળામાં ભીંસાઈ ગયું. ગણતરીની સેકન્ડોમાં જ મોહિની હવામાં લટકાઈ ગઈ અને મદદ માટે કોઈ હાજર ન હોવાથી તેનું ઘટનાસ્થળે જ ગૂંગળામણને કારણે મોત નીપજ્યું. એક નાનકડી ભૂલ અને વાયરલ થવાની અતિશય ઘેલછાએ એક હસતા-રમતા જીવનનો અકાળે અંત આણી દીધો.

જ્યારે પરિવારના સભ્યો રૂમમાં પહોંચ્યા ત્યારે મોહિનીને લટકતી હાલતમાં જોઈ તેમના હોશ ઉડી ગયા હતા. પોલીસ તપાસમાં જાણવા મળ્યું છે કે મોબાઈલ ફોન હજુ પણ રેકોર્ડિંગ મોડમાં હતો અથવા સ્ટેન્ડ પર ગોઠવાયેલો હતો, જે સાબિત કરે છે કે તે માત્ર રીલ જ બનાવી રહી હતી. આ ઘટનાએ સોશિયલ મીડિયા યુઝર્સ માટે એક લાલબત્તી સમાન કિસ્સો પૂરો પાડ્યો છે કે લાઈક્સ અને વ્યૂઝ મેળવવા માટે જીવના જોખમે સ્ટંટ કરવા કેટલા ભારે પડી શકે છે.