કાનપુર: ઉત્તર પ્રદેશના કાનપુરમાં શનિવારે મોડી રાત્રે એક કાળજું કંપાવનારી ઘટના બની છે, જ્યાં એક યુવકે પોલીસની હાજરીમાં જ પોતાને આગ ચાંપી દીધી હતી. કલ્યાણપુર વિસ્તારમાં રહેતા અનુરાગ દીક્ષિત ઉર્ફે રાહુલે પડોશીઓ સાથેની તકરાર અને પોલીસની કથિત હેરાનગતિથી કંટાળીને આ આઘાતજનક પગલું ભર્યું હતું. પથ્થરમારાની ખોટી બાતમી મળતા જ્યારે પોલીસ કાફલો ઘટનાસ્થળે પહોંચ્યો, ત્યારે અનુરાગ એટલો ગભરાઈ ગયો કે તેણે રૂમમાં પુરાઈને કેરોસીન છાંટી દીધું. હાલમાં ૨૫ ટકા દાઝી ગયેલા યુવકની હોસ્પિટલમાં જીવન-મરણ વચ્ચે લડાઈ ચાલી રહી છે.

ઘટનાની પૃષ્ઠભૂમિમાં જાન્યુઆરી મહિનામાં થયેલી એક બબાલ જવાબદાર હોવાનું સામે આવ્યું છે. ૧૧ જાન્યુઆરીના રોજ અનુરાગના પડોશી શિવમ કટિયારે બેફામ ગાડી ચલાવવા મુદ્દે ઠપકો આપતા અનુરાગના પરિવાર પર જીવલેણ હુમલો કર્યો હતો. આ હુમલામાં અનુરાગની માતા ગંભીર રીતે ઘાયલ થઈ હતી અને ૨૫ દિવસ સુધી હોસ્પિટલમાં રહી હતી. જોકે પોલીસમાં ફરિયાદ નોંધાઈ અને ચાર્જશીટ પણ દાખલ થઈ, પરંતુ આરોપીઓની ધરપકડ ન થતા તેઓ સતત અનુરાગના પરિવાર પર સમાધાન માટે દબાણ કરી રહ્યા હતા અને અવારનવાર પોલીસને ખોટી માહિતી આપી હેરાન કરતા હતા.

શનિવારે રાત્રે પણ આવી જ એક ખોટી ફરિયાદના આધારે પોલીસ અનુરાગના ઘરે પહોંચી હતી. પરિવારનો આરોપ છે કે પોલીસે સ્થિતિને સમજ્યા વગર સીધો અનુરાગને પોલીસ સ્ટેશન આવવા દબાણ કર્યું હતું. આરોપી પક્ષના સતત માનસિક ત્રાસ અને હવે પોલીસની કથિત જોહુકમીથી ફફડી ગયેલા અનુરાગે તાત્કાલિક ઘરમાં જઈને દીવાસળી ચાંપી દીધી હતી. આગની લપેટમાં ઘેરાયેલા યુવકને જોઈને પોલીસ અને પરિવારમાં દોડધામ મચી ગઈ હતી અને તેને માંડ-માંડ ઉર્સુલા હોસ્પિટલમાં દાખલ કરવામાં આવ્યો હતો.

આ મામલે ડીસીપી વેસ્ટ એસ.એમ. કાસિમ આબિદીએ જણાવ્યું છે કે યુવકે આત્મહત્યાનો પ્રયાસ કર્યો છે અને સમગ્ર મામલે ઉંડી તપાસ કરવામાં આવી રહી છે. પરિવારે પોલીસની કામગીરી સામે પણ ગંભીર સવાલો ઉઠાવ્યા છે, જેના પગલે તપાસ અધિકારીઓએ ખાતરી આપી છે કે જો કોઈ પોલીસ કર્મચારી દોષિત જણાશે તો તેની સામે પણ કડક કાર્યવાહી કરાશે. કાનપુરની આ ઘટનાએ પોલીસની તપાસ પદ્ધતિ અને પીડિત પરિવારને સુરક્ષા આપવામાં તંત્રની નિષ્ફળતા સામે ફરી એકવાર પ્રશ્નાર્થ ચિન્હ ઉભું કર્યું છે.