ઇમ્ફાલ: મણિપુરમાં અશાંતિ ફેલાવનારા તત્વો સામે સુરક્ષા દળોએ લાલ આંખ કરી છે. પોલીસે શનિવારે રાજ્યના વિવિધ ખીણ વિસ્તારોમાં ઓપરેશન ચલાવીને અલગ-અલગ પ્રતિબંધિત સંગઠનો સાથે જોડાયેલા ચાર આતંકવાદીઓની ધરપકડ કરવામાં મોટી સફળતા મેળવી છે. આ આતંકીઓ લાંબા સમયથી વેપારીઓ અને સ્થાનિક લોકો પાસેથી ખંડણી ઉઘરાવવાની સાથે ગુનાહિત પ્રવૃત્તિઓમાં સામેલ હોવાની માહિતી પોલીસને મળી હતી. ધરપકડ કરાયેલા આરોપીઓ પાસેથી મહત્વની કડીઓ મળવાની આશા છે, જે આતંકી ફંડિંગના સ્ત્રોત સુધી પહોંચવામાં મદદરૂપ થશે.

સુરક્ષા દળોને માત્ર આતંકીઓની ધરપકડમાં જ નહીં, પરંતુ મોટા વિસ્ફોટકોના જથ્થાને નિષ્ક્રિય કરવામાં પણ સફળતા મળી છે. ટેન્ગનોપાલ જિલ્લામાં ભારત-મ્યાનમાર સરહદ પર આવેલા યાંગોબુંગ વિસ્તારમાં સર્ચ ઓપરેશન દરમિયાન એક મોર્ટાર અને બે શક્તિશાળી IED (વિસ્ફોટકો) મળી આવ્યા હતા. બોમ્બ ડિસ્પોઝલ સ્ક્વોડ દ્વારા આ જોખમી વિસ્ફોટકોનો ઘટનાસ્થળે જ નાશ કરવામાં આવ્યો હતો, જેનાથી સરહદી વિસ્તારમાં મોટી આતંકી ઘટના ટળી હોવાનું માનવામાં આવી રહ્યું છે.

ધરપકડ કરાયેલા આતંકીઓ અલગ-અલગ સંગઠનોના હોવાનું બહાર આવ્યું છે. પોલીસે ઇમ્ફાલ પૂર્વ અને પશ્ચિમ જિલ્લામાંથી PREPAK સંગઠનના બે સક્રિય કાર્યકરોની ધરપકડ કરી છે. આ ઉપરાંત, કાકચિંગ જિલ્લાના કાકચિંગ લામખાઈ વિસ્તારમાંથી પ્રતિબંધિત KYKL સંગઠનનો એક આતંકી અને શુક્રવારે ઇમ્ફાલ પશ્ચિમના કાંચીપુર વિસ્તારમાંથી UNLF (K) સંગઠનનો એક સભ્ય પોલીસના સકંજામાં આવ્યો છે. આ તમામ આતંકીઓ ખીણ વિસ્તારોમાં ભયનું વાતાવરણ ઉભું કરી ગેરકાયદેસર ઉઘરાણાં કરી રહ્યા હતા.

મણિપુર પોલીસના જણાવ્યા અનુસાર, ગુપ્તચર એજન્સીઓ પાસેથી મળેલી ચોક્કસ બાતમીના આધારે આ સમગ્ર કાર્યવાહી હાથ ધરવામાં આવી હતી. હાલમાં પણ સંવેદનશીલ વિસ્તારોમાં ઘેરાબંધી કરીને સઘન સર્ચ ઓપરેશન ચાલુ રાખવામાં આવ્યું છે. પોલીસ વડાએ સ્પષ્ટ સંદેશ આપ્યો છે કે ખંડણી અને આતંકવાદ સામે કોઈ પણ પ્રકારની નરમાશ રાખવામાં આવશે નહીં. સરહદી વિસ્તારોમાં વધારાના સુરક્ષા દળો તૈનાત કરી દેવામાં આવ્યા છે જેથી કરીને સરહદ પારથી થતી ઘૂસણખોરી અને હથિયારોની હેરાફેરી અટકાવી શકાય.