કોલંબો: ભારત અને પાકિસ્તાન વચ્ચેની ક્રિકેટ મેચ હંમેશા રમત કરતા પ્રતિષ્ઠાનો જંગ વધુ હોય છે, પરંતુ આ વખતે T20 વર્લ્ડ કપમાં આ જંગ મેદાનની બહાર પણ ઉગ્ર બની છે. ૧૫ ફેબ્રુઆરીએ કોલંબોમાં યોજાનારી ગ્રુપ-Aની સૌથી મોટી મેચને લઈને પાકિસ્તાન ક્રિકેટ બોર્ડ (PCB) એ આક્રમક વલણ અપનાવ્યું છે. પાકિસ્તાન સરકાર અને વડાપ્રધાન શાહબાઝ શરીફે પોતાની ટીમને ભારત સામે રમવા પર પ્રતિબંધ લાદતા હવે મેચના આયોજન પર પ્રશ્નાર્થ ચિન્હ ઉભું થયું છે. આટલા વિવાદ વચ્ચે પણ પીસીબીએ સ્પષ્ટ કર્યું છે કે તેઓ આ મુદ્દે આંતરરાષ્ટ્રીય ક્રિકેટ કાઉન્સિલ (ICC) સાથે કોઈ પણ પ્રકારની વાટાઘાટો કરી રહ્યા નથી.

છેલ્લા કેટલાક દિવસોથી એવા અહેવાલો વહેતા થયા હતા કે પાકિસ્તાન કાનૂની કાર્યવાહી અને મહત્વના પોઈન્ટ્સ ગુમાવવાના ડરથી ફરીથી ICC સાથે સંપર્કમાં છે. જોકે, પાકિસ્તાન બોર્ડના પ્રવક્તા આમિર મીરે આ તમામ દાવાઓને સખત શબ્દોમાં નકારી કાઢ્યા છે. સોશિયલ મીડિયા પર 'X' પર પ્રતિક્રિયા આપતા તેમણે ભારતીય મીડિયાના એક વર્ગ પર ખોટી અને બનાવટી વાર્તાઓ ફેલાવવાનો આરોપ મૂક્યો હતો. મીરે કટાક્ષમાં જણાવ્યું કે પાકિસ્તાન સરકારના આદેશનું પાલન કરવું એ તેમની પ્રાથમિકતા છે અને સમય જતાં સ્પષ્ટ થઈ જશે કે હકીકતમાં દબાણ હેઠળ કોણ છે.

જો પાકિસ્તાન આ મેચનો બહિષ્કાર કરે છે, તો તેને ટૂર્નામેન્ટમાં મોટું નુકસાન વેઠવું પડી શકે છે. ICCના નિયમો મુજબ, મેચ ન રમવા બદલ પાકિસ્તાન ૨ મહત્વના પોઈન્ટ્સ ગુમાવશે, જેની સીધી અસર તેમના સેમીફાઈનલના સમીકરણો અને નેટ રન રેટ પર પડશે. ICC આ પરિસ્થિતિને થાળે પાડવા માટે મધ્યસ્થી કરવાનો પ્રયાસ કરી રહ્યું છે, કારણ કે ભારત-પાક મેચ એ સમગ્ર ટૂર્નામેન્ટની સૌથી વધુ કમાણી કરી આપનારી ઇવેન્ટ છે. બ્રોડકાસ્ટર્સ અને સ્પોન્સર્સના કરોડો રૂપિયા આ મેચ પર દાવ પર લાગેલા છે, પરંતુ હાલના સંજોગોમાં પાકિસ્તાન પાછળ હટવા તૈયાર નથી.

બીજી તરફ, ભારતીય ક્રિકેટ બોર્ડ (BCCI) એ આ આખા વિવાદમાં મૌન જાળવી રાખ્યું છે અને તે ICC ના સત્તાવાર શેડ્યૂલને અનુસરી રહ્યું છે. ભારતીય કેપ્ટન સૂર્યકુમાર યાદવે સ્પષ્ટ સંદેશ આપ્યો છે કે ટીમ ઇન્ડિયા નિર્ધારિત સમયે કોલંબો પહોંચશે અને મેદાન પર ઉતરવા માટે પૂરી રીતે તૈયાર છે. હવે જોવાનું એ રહેશે કે ૧૫ ફેબ્રુઆરીના રોજ કોલંબોમાં ભારત સામે પાકિસ્તાનની ટીમ મેદાનમાં ઉતરે છે કે પછી રાજકીય ખેંચતાણને કારણે ક્રિકેટ પ્રેમીઓએ આ રોમાંચક મેચ ગુમાવવી પડશે.