લખીમપુર ખેરી: ઉત્તર પ્રદેશના લખીમપુર ખેરી જિલ્લામાં શનિવારે મધરાતે એક હૃદયદ્રાવક અકસ્માત સર્જાયો છે. ધૌરહરા પોલીસ સ્ટેશન વિસ્તારમાં ગાઢ ધુમ્મસને કારણે વિઝિબિલિટી ઓછી હોવાથી મુસાફરોથી ભરેલો એક ટેમ્પો બેકાબૂ થઈને પલટી મારી ગયો હતો. આ ભયાનક દુર્ઘટનામાં ત્રણ નિર્દોષ બાળકોના ઘટનાસ્થળે જ કમકમાટીભર્યા મોત નીપજ્યા હતા, જ્યારે ગંભીર રીતે ઘાયલ થયેલા ટેમ્પો ચાલકે સારવાર દરમિયાન દમ તોડ્યો હતો. અકસ્માત એટલો જોરદાર હતો કે ટેમ્પોનો કચ્ચરઘાણ નીકળી ગયો હતો અને આસપાસના વિસ્તારમાં ચીસ અને પોકાર મચી ગઈ હતી.

મળતી માહિતી મુજબ, ઊંચગાંવના રહેવાસીઓ ધૌરહરા ખાતે આયોજિત એક ધાર્મિક કાર્યક્રમમાં હાજરી આપીને રાત્રે આશરે ૧૨:૪૫ વાગ્યે પરત ફરી રહ્યા હતા. રાત્રિના સમયે છવાયેલા ગાઢ ધુમ્મસને કારણે રસ્તો બરાબર દેખાતો ન હોવાથી બસંતપુર કલ્વર્ટ પાસે ચાલકે વાહન પરથી કાબુ ગુમાવ્યો હતો. ટેમ્પો પલટી જતાં તેમાં સવાર બાળકો અને મહિલાઓ દબાઈ ગયા હતા. સ્થાનિક લોકો અને પસાર થતા વાહનચાલકોની મદદથી બચાવ કામગીરી શરૂ કરવામાં આવી હતી, પરંતુ વિધિની વક્રતા એવી હતી કે ત્રણ માસૂમોએ હોસ્પિટલ પહોંચતા પહેલા જ જીવ ગુમાવી દીધો હતો.

અકસ્માતની જાણ થતા જ ધૌરહરા પોલીસનો કાફલો ઘટનાસ્થળે પહોંચી ગયો હતો. પોલીસે તાત્કાલિક તમામ ઘાયલોને ધૌરહરા સ્થિત કોમ્યુનિટી હેલ્થ સેન્ટર (CHC) ખાતે ખસેડ્યા હતા. ઈજાગ્રસ્ત પાંચ લોકોની હાલત અત્યંત ગંભીર હોવાનું જણાવાઈ રહ્યું છે, જેમને વધુ સારવાર માટે મોટી હોસ્પિટલમાં રેફર કરવામાં આવ્યા છે. મૃતકોના પરિવારમાં આ સમાચાર મળતા જ માતમ છવાઈ ગયો છે. જે ઘરમાં થોડા કલાકો પહેલા ભક્તિનો માહોલ હતો, ત્યાં હવે આક્રંદ સંભળાઈ રહ્યો છે.

પોલીસના જણાવ્યા અનુસાર, પ્રાથમિક દ્રષ્ટિએ ગાઢ ધુમ્મસ જ આ અકસ્માતનું મુખ્ય કારણ જણાય છે, જોકે વાહનની સ્પીડ કે કોઈ ટેકનિકલ ખામી હતી કે કેમ તે અંગે તપાસ હાથ ધરવામાં આવી છે. શિયાળાની ઋતુમાં ધુમ્મસને કારણે ઉત્તર ભારતમાં માર્ગ અકસ્માતોનું પ્રમાણ વધી જાય છે, ત્યારે આ ઘટનાએ ફરી એકવાર રાત્રિ મુસાફરીમાં સાવચેતી રાખવા પર લાલબત્તી ધરી છે. વહીવટીતંત્રે મૃતકોના પોસ્ટમોર્ટમની પ્રક્રિયા હાથ ધરી છે અને ઈજાગ્રસ્તોને શ્રેષ્ઠ સારવાર મળે તે માટે સૂચનાઓ આપી છે.