તેહરાન:ઈરાન અને અમેરિકા વચ્ચે ચાલી રહેલા લાંબા ગાળાના તણાવમાં એક નવો અને અત્યંત આઘાતજનક વળાંક આવ્યો છે. ઈરાનની રાષ્ટ્રીય સુરક્ષા સમિતિના ઉપાધ્યક્ષ મહમૂદ નબાવિયનએ દાવો કર્યો છે કે રાષ્ટ્રપતિ ડોનાલ્ડ ટ્રમ્પે ઓમાનમાં મંત્રણા શરૂ થાય તે પહેલાં એક વિચિત્ર પ્રસ્તાવ મોકલ્યો હતો. આ પ્રસ્તાવ મુજબ, અમેરિકા ઈરાનના બે લશ્કરી ઠેકાણાઓ પર હુમલો કરવા માંગતું હતું અને બદલામાં ઈરાને પણ 'યોગ્ય જવાબ' આપવાનો ડોળ કરવાનો હતો. આ પ્રકારના 'ફિક્સ્ડ' હુમલા પાછળનો હેતુ વિશ્વ સમક્ષ અમેરિકાની શક્તિ પ્રદર્શિત કરવાનો હોવાનું માનવામાં આવે છે, પરંતુ ઈરાને આ ઓફરને સખત શબ્દોમાં ફગાવી દીધી છે.

મહમૂદ નબાવિયન, જેઓ ઈરાનના સુપ્રીમ લીડર અલી ખામેનીના કટ્ટર વફાદાર માનવામાં આવે છે, તેમણે વધુમાં એક ગંભીર આરોપ લગાવ્યો છે. તેમણે જણાવ્યું કે અમેરિકાએ અગાઉ વેનેઝુએલાના રાષ્ટ્રપતિ માદુરો સાથે જેવું કર્યું હતું, તેવું જ કાવતરું ઈરાની નેતૃત્વ સામે ઘડ્યું હતું. 12 દિવસના ગુપ્ત યુદ્ધ જેવી સ્થિતિ દરમિયાન ઈરાની ટોચના નેતાઓના અપહરણનો પ્રયાસ કરવામાં આવ્યો હતો, પરંતુ ઈરાની સુરક્ષા એજન્સીઓની સતર્કતાને કારણે તે નિષ્ફળ રહ્યો હતો. નબાવિયનના આ ખુલાસાએ પશ્ચિમી દેશો અને ઈરાન વચ્ચેના સંબંધોમાં વ્યાપેલી અવિશ્વાસની ખાઈને વધુ ઊંડી બનાવી દીધી છે.

ઈરાનના આ ફાયરબ્રાન્ડ નેતાએ અમેરિકાને સીધી ચેતવણી આપતા કહ્યું છે કે "હવે એ યુગ પૂરો થઈ ગયો છે જ્યારે અમેરિકા મનફાવે તેમ કરી શકતું હતું." તેમણે સ્પષ્ટ કર્યું કે જો અમેરિકા હવે કોઈ ભૂલ કરશે, તો તેણે હજારો સૈનિકોના મૃતદેહો લેવા તૈયાર રહેવું પડશે. ઈરાને પોતાના પ્રાદેશિક સાથી દેશોને પણ સંદેશ મોકલ્યો છે કે અમેરિકા સાથે સંકળાયેલું કોઈપણ લશ્કરી ઠેકાણું કે કંપની હવે ઈરાની મિસાઈલોના સીધા નિશાન પર રહેશે. આક્રમક વિચારધારા ધરાવતા નબાવિયન હંમેશા પશ્ચિમી દેશો અને પરમાણુ કરારના (JCPOA) પ્રખર વિરોધી રહ્યા છે.

આંતરરાષ્ટ્રીય સ્તરે આ સમાચાર વાયુવેગે ફેલાઈ રહ્યા છે, કારણ કે આમાં સીધો આરોપ અમેરિકી રાષ્ટ્રપતિ પર લગાવવામાં આવ્યો છે. નબાવિયન જેઓ સંસદ સભ્ય હોવાની સાથે વિદેશ નીતિ સમિતિના સભ્ય પણ છે, તેમણે આંતરરાષ્ટ્રીય પરમાણુ ઊર્જા એજન્સી (IAEA) ના સભ્યોને પણ 'જાસૂસ' ગણાવી વિવાદ છેડ્યો હતો. ટ્રમ્પ વહીવટીતંત્ર દ્વારા આ દાવાઓ પર હજુ સુધી કોઈ સત્તાવાર પ્રતિક્રિયા આપવામાં આવી નથી, પરંતુ મધ્ય-પૂર્વમાં વધી રહેલો આ રાજકીય અને લશ્કરી ગરમાવો કોઈ મોટા આર્થિક કે યુદ્ધાત્મક સંકટ તરફ ઈશારો કરી રહ્યો છે.