ઢાકા: બાંગ્લાદેશમાં 2026ની સામાન્ય ચૂંટણીઓનો શંખનાદ થઈ ચૂક્યો છે, પરંતુ આ વખતે લડાઈ મેદાન કરતાં સોશિયલ મીડિયા પર વધુ વરવી બની છે. મહિલા ઉમેદવારો માટે આ ચૂંટણી એક ભયાનક દુઃસ્વપ્ન સાબિત થઈ રહી છે, કારણ કે તેમને પછાડવા માટે હવે નીતિઓ નહીં પણ 'ડીપફેક' ટેકનોલોજીનો સહારો લેવામાં આવી રહ્યો છે. આધુનિક આર્ટિફિશિયલ ઈન્ટેલિજન્સ (AI) દ્વારા મહિલા નેતાઓની વાંધાજનક અને અશ્લીલ છબીઓ બનાવી તેમને માનસિક રીતે તોડી પાડવાનું વ્યવસ્થિત ષડયંત્ર ચાલી રહ્યું છે.

પરિવાર અને સન્માનને નિશાન બનાવતી 'ટ્રોલ આર્મી' રાજકીય વિશ્લેષકોના મતે, આ માત્ર ઓનલાઈન ટીકા નથી પણ લિંગ-આધારિત ડિજિટલ હિંસા છે. બાંગ્લાદેશ જેવા રૂઢિચુસ્ત સમાજમાં મહિલાનું સન્માન તેના પરિવાર સાથે જોડાયેલું હોય છે, જેનો ફાયદો ઉઠાવી વિરોધ પક્ષોની 'ટ્રોલ આર્મી' મહિલા ઉમેદવારોના અંગત જીવન અને પહેરવેશ પર હુમલા કરી રહી છે. આ હુમલાઓનો મુખ્ય હેતુ મહિલાઓને ચૂંટણી મેદાન છોડવા મજબૂર કરવાનો અને લોકશાહીમાં તેમની ભાગીદારી ઘટાડવાનો છે.

ગ્લોબલ વોર્નિંગ: ટેકનોલોજીનો લોકશાહી વિરોધી ચહેરો આ પરિસ્થિતિએ માત્ર બાંગ્લાદેશ જ નહીં પણ ભારત સહિત સમગ્ર વિશ્વ માટે ખતરાની ઘંટડી વગાડી છે. માનવાધિકાર સંગઠનો અને મહિલા અધિકાર જૂથોએ આને "લોકશાહી માટે ખતરો" ગણાવ્યો છે. ભોગ બનેલી મહિલા નેતાઓએ મેટા (ફેસબુક) અને ટિકટોક જેવી કંપનીઓ પાસે કડક કાર્યવાહીની માંગ કરી છે. જોકે, વહીવટીતંત્રની ધીમી કામગીરી ચિંતાનો વિષય છે. આ ઘટનાક્રમ સાબિત કરે છે કે જો AI પર લગામ નહીં કસવામાં આવે, તો ભવિષ્યમાં નિષ્પક્ષ ચૂંટણી પ્રક્રિયાઓ જોખમમાં મુકાઈ શકે છે.