નવી દિલ્હી:  વર્તમાન વૈશ્વિક અશાંતિ અને સરહદો પરના તણાવ વચ્ચે ભારત સરકારે દેશની સુરક્ષા માટે તિજોરીના દ્વાર ખોલી દીધા છે. કેન્દ્રીય બજેટ ૨૦૨૬-૨૭માં સંરક્ષણ ક્ષેત્ર માટે અંદાજે ૭,૮૫,૦૦૦ કરોડ રૂપિયાની ફાળવણી કરવામાં આવી છે. નાણાકીય સલાહકાર (સંરક્ષણ સેવાઓ) રાજ કુમાર અરોરાએ જણાવ્યું હતું કે, આ ફાળવણી ગત વર્ષ કરતા ૧૬% વધુ છે, જે ભારતીય સશસ્ત્ર દળોની લડાયક ક્ષમતાને નવી ઊંચાઈ પર લઈ જશે.

આત્મનિર્ભરતા હવે વિકલ્પ નહીં, અનિવાર્યતા

અરોરાએ ભાર મૂક્યો હતો કે બદલાતા ભૂ-રાજકીય સમીકરણોમાં ભારત હવે હથિયારો માટે બીજા દેશો પર નિર્ભર રહી શકે તેમ નથી. આ બજેટથી વ્યૂહાત્મક સ્વાયત્તતા વધશે અને હથિયારોની સપ્લાય ચેઈનમાં સુધારો થશે. ખાસ કરીને 'ઓપરેશન સિંદૂર' પછીના અનુભવોને ધ્યાનમાં રાખીને સરકારે સૈન્ય આધુનિકીકરણ અને ફાસ્ટ-ટ્રેક ખરીદી પર વધુ ધ્યાન આપ્યું છે.

ઓપરેશન સિંદૂર બાદ સૈન્ય ક્ષમતામાં મોટો ઉછાળો

સંરક્ષણ સલાહકારના જણાવ્યા મુજબ, ઓપરેશન સિંદૂર બાદ સરકારે તાત્કાલિક ધોરણે ખરીદી પ્રક્રિયા તેજ કરી છે. મૂડી ખરીદી (Capital Acquisition) માટે ૩૫,૦૦૦ કરોડ રૂપિયાથી વધુ અને મહેસૂલ પ્રોજેક્ટ્સ માટે ૧૭,૦૦૦ કરોડ રૂપિયાની ફાળવણી કરવામાં આવી છે. આ રકમનો ઉપયોગ નવા શસ્ત્રો, ટેન્કો, અત્યાધુનિક મિસાઇલો અને દારૂગોળાની ઉપલબ્ધતા વધારવા માટે કરવામાં આવશે.

લાંબા ગાળાની રાષ્ટ્રીય સુરક્ષા પર ભાર

દેશની સુરક્ષા માટે મજબૂત પ્રતિરોધકતા (Deterrence) અત્યંત જરૂરી છે. આ બજેટ દ્વારા સશસ્ત્ર દળોની ગતિશીલતા (Mobility) અને આધુનિકીકરણ સુનિશ્ચિત કરવામાં આવશે. સૈનિકોને મળતા સાધનોથી લઈને સરહદી માળખાગત સુવિધાઓ સુધીના તમામ પાસાઓને આ બજેટમાં મજબૂત કરવાનો પ્રયાસ કરવામાં આવ્યો છે, જેથી ભારત કોઈપણ પડકારનો સામનો કરવા માટે સજ્જ રહે.