હૈદરાબાદ: ભારતના બે ફાયરબ્રાન્ડ નેતાઓ — આસામના મુખ્યમંત્રી હિમંતા બિસ્વા શર્મા અને AIMIM ચીફ અસદુદ્દીન ઓવૈસી — વચ્ચેનો શાબ્દિક જંગ હવે કાયદાકીય લડાઈમાં ફેરવાઈ ગયો છે. હૈદરાબાદના સાંસદ ઓવૈસીએ આસામના મુખ્યમંત્રી વિરુદ્ધ હૈદરાબાદ પોલીસ કમિશનરને ફરિયાદ સોંપીને ફોજદારી કાર્યવાહી કરવાની માંગ કરી છે. આ વિવાદની જડમાં આસામ ભાજપ દ્વારા શેર કરવામાં આવેલો એક કથિત વીડિયો છે, જેણે સોશિયલ મીડિયા પર હોબાળો મચાવ્યો છે.
અસદુદ્દીન ઓવૈસીના જણાવ્યા અનુસાર, આસામ ભાજપના સત્તાવાર સોશિયલ મીડિયા હેન્ડલ પરથી એક વીડિયો પોસ્ટ કરવામાં આવ્યો હતો (જેને હવે ડિલીટ કરી દેવાયો છે). ઓવૈસીનો આરોપ છે કે આ વીડિયોમાં મુખ્યમંત્રી હિમંતા બિસ્વા શર્મા મુસ્લિમો તરફ બંદૂક તાકીને 'ગોળીબાર' કરતા દેખાય છે. ઓવૈસીએ આ વીડિયોને અત્યંત ઉશ્કેરણીજનક અને હિંસક ગણાવ્યો છે. તેમણે કહ્યું કે એક જવાબદાર પદ પર બેઠેલા મુખ્યમંત્રી દ્વારા આવું પ્રદર્શન કરવું એ સીધી રીતે જ સમુદાય વિશેષ વિરુદ્ધ હિંસાને પ્રોત્સાહન આપવા સમાન છે.
 આ મામલે ફરિયાદ નોંધાવ્યા બાદ ઓવૈસીએ કહ્યું હતું કે, "અમે નફરતના આ રાજકારણને સાંખી નહીં લઈએ." રસપ્રદ વાત એ છે કે, આ દરમિયાન જ અસદુદ્દીન ઓવૈસીના ભાઈ અકબરુદ્દીન ઓવૈસીએ પણ ઉત્તર પ્રદેશના મુખ્યમંત્રી યોગી આદિત્યનાથને ખુલ્લો પડકાર ફેંકતા વિવાદમાં નવો વળાંક આપ્યો છે. ભાજપના નેતાઓએ વળતો પ્રહાર કરતા કહ્યું છે કે ઓવૈસી ભાઈઓ પોતે જ હંમેશા ઉશ્કેરણીજનક ભાષણો આપવા માટે જાણીતા છે.
 હૈદરાબાદ પોલીસે ફરિયાદ સ્વીકારીને આ મામલે તપાસ શરૂ કરી છે. આ ઘટનાક્રમ એવા સમયે આવ્યો છે જ્યારે આસામ અને પશ્ચિમ બંગાળ સહિતના રાજ્યોમાં વિધાનસભા ચૂંટણીઓની તૈયારીઓ ચાલી રહી છે. રાજકીય વિશ્લેષકોનું માનવું છે કે આવા વિવાદોથી ચૂંટણી પ્રચાર વધુ ધ્રુવીકૃત બની શકે છે