જમ્મુ: મા વૈષ્ણો દેવીના દર્શને જતા લાખો શ્રદ્ધાળુઓ માટે સુરક્ષા અને સુવિધાના મોરચે મોટા સમાચાર સામે આવ્યા છે. તાજેતરમાં યોજાયેલી શ્રી માતા વૈષ્ણો દેવી શ્રાઈન બોર્ડની મહત્વપૂર્ણ બેઠકમાં યાત્રાળુઓના હિતમાં મોટો નિર્ણય લેતા ફ્રી વીમા કવચની રકમ બમણી કરી દેવામાં આવી છે. હવે યાત્રા દરમિયાન કોઈ અણધારી ઘટના બને તો શ્રદ્ધાળુઓને મળતી સહાય રૂ. 5 લાખથી વધારીને રૂ. 10 લાખ કરવામાં આવી છે.
જમ્મુ-કાશ્મીરના ઉપરાજ્યપાલની અધ્યક્ષતામાં મળેલી આ ઉચ્ચ સ્તરીય બેઠકમાં ભક્તોની સુરક્ષા પર સૌથી વધુ ભાર મૂકવામાં આવ્યો હતો. બોર્ડ દ્વારા લેવાયેલા નિર્ણય મુજબ, યાત્રા માર્ગ પર અકસ્માત કે અન્ય કુદરતી આપત્તિના કિસ્સામાં યાત્રાળુઓ અને તેમના પરિવારોને આર્થિક ટેકો આપવા માટે વીમાની રકમમાં 100% નો વધારો કરવામાં આવ્યો છે. આ સુવિધા દરેક રજિસ્ટર્ડ યાત્રાળુને વિનામૂલ્યે મળશે.
 માત્ર વીમો જ નહીં, પણ ભક્તોની સુવિધા માટે અન્ય ઘણા પ્રોજેક્ટ્સને પણ મંજૂરી આપવામાં આવી છે. જેમાં ભવન (દરબાર) અને કટરા વચ્ચેના માર્ગ પર ભીડને નિયંત્રિત કરવા માટે નવી ટેકનોલોજીનો ઉપયોગ, વધુ સીસીટીવી કેમેરા અને આરએફઆઈડી (RFID) ટ્રેકિંગ સિસ્ટમને વધુ મજબૂત બનાવવામાં આવશે. યાત્રાળુઓને ખાવા-પીવાની અને રહેવાની વધુ સારી સગવડ મળે તે માટે નવા ગેસ્ટ હાઉસ અને લંગરની સુવિધામાં પણ વધારો કરવાની યોજના છે.
  બોર્ડ મીટિંગમાં યાત્રાના રજિસ્ટ્રેશનથી લઈને આરતી અને પ્રસાદના વિતરણ સુધીની પ્રક્રિયાને વધુ ડિજિટલ બનાવવાનો નિર્ણય લેવાયો છે. ભક્તો લાઈનમાં ઉભા રહ્યા વગર સરળતાથી દર્શન કરી શકે તે માટે મેનેજમેન્ટમાં ધરખમ ફેરફારો કરવામાં આવશે. ખાસ કરીને તહેવારોના સમયે વધતી ભીડને પહોંચી વળવા માટે વધારાના સુરક્ષા દળો અને મેડિકલ ટીમોની તૈનાતી પર પણ મહોર મારવામાં આવી છે. મા વૈષ્ણો દેવી શ્રાઈન બોર્ડના આ નિર્ણયોથી આગામી દિવસોમાં યાત્રા વધુ સુરક્ષિત, સુગમ અને આધુનિક બનશે તે નક્કી છે.