મુંબઈ:  મહારાષ્ટ્રના રાજકારણમાં ફરી એકવાર 'મહાયુતિ' અને ખાસ કરીને ભાજપનો ભગવો લહેરાયો છે. તાજેતરની જિલ્લા પરિષદ અને પંચાયત સમિતિની ચૂંટણીના પરિણામોએ સાબિત કરી દીધું છે કે ભાજપ હવે માત્ર શહેરોની પાર્ટી નથી રહી, પરંતુ ગ્રામીણ મહારાષ્ટ્રના હૃદયમાં પણ તેણે મજબૂત સ્થાન જમાવ્યું છે. મુખ્યમંત્રી દેવેન્દ્ર ફડણવીસે વિજયના આંકડા રજૂ કરતા ગર્વભેર જણાવ્યું કે, ૨૦૧૭માં ભાજપે ૨૮૪ બેઠકો મેળવી હતી, જ્યારે આ વખતે આ આંકડો ૪૧૦ પર પહોંચી ગયો છે. આ પ્રચંડ જીતે ૨૦૧૪થી શરૂ થયેલા ભાજપના વિજય રથને વધુ વેગ આપ્યો છે, જેણે વિરોધ પક્ષોને આત્મમંથન કરવા મજબૂર કરી દીધા છે.

ચૂંટણી પરિણામોના વિશ્લેષણ દરમિયાન મુખ્યમંત્રી ફડણવીસે કોલ્હાપુર અને લાતુર જેવા જિલ્લાઓના ઉદાહરણ આપી જણાવ્યું કે, જ્યાં ત્રણેય પક્ષોએ સાથે મળીને લડત આપી હતી ત્યાં પણ મહાયુતિ નંબર વન બનીને ઉભરી છે. ૧૨૫ પંચાયત સમિતિઓમાંથી ૧૦૦થી વધુ પર ગઠબંધનનો કબજો એ સ્પષ્ટ સંકેત છે કે જનતાએ ડબલ એન્જિન સરકારની નીતિઓને મહોર મારી છે. આ વિજયના ઉત્સાહ વચ્ચે ફડણવીસે અત્યંત ભાવુક બનીને સ્વર્ગસ્થ નેતા અજિત પવારને પણ યાદ કર્યા હતા. તેમણે કહ્યું કે અજિત પવારનું અકાળે અવસાન એ ગઠબંધન માટે મોટી ખોટ હતી, પરંતુ આ પરિણામો તેમને સાચી શ્રદ્ધાંજલિ સમાન છે.

વિપક્ષ પર આકરા પ્રહારો કરતા ફડણવીસે ઉમેર્યું કે, વિરોધ પક્ષો માત્ર દોષારોપણની રાજનીતિમાં રચ્યાપચ્યા રહે છે અને જનતાની નાડી પારખવામાં નિષ્ફળ ગયા છે. "વિપક્ષે હવે એ સમજવાની જરૂર છે કે જનતા કામ માંગે છે, માત્ર વાતો નહીં," તેમ કહી તેમણે સ્પષ્ટ કર્યું કે ભાજપની તાકાત ગ્રામીણ સ્તરે અનેકગણી વધી ગઈ છે. તમામ પરિણામો જાહેર થયા બાદ ભાજપ રાજ્યની સર્વોચ્ચ શક્તિ તરીકે ઉભરશે તેવું ચિત્ર હવે સ્પષ્ટ દેખાઈ રહ્યું છે. આ જીત આવનારી વિધાનસભા ચૂંટણીઓ માટે પણ ભાજપનો આત્મવિશ્વાસ બમણો કરનારી સાબિત થશે.