નવી દિલ્હી:  દેશના લાખો કેન્દ્રીય કર્મચારીઓ અને પેન્શનરો માટે આ વર્ષની હોળી રંગીન બનવા જઈ રહી છે. મોંઘવારીના માર વચ્ચે કેન્દ્ર સરકાર મોંઘવારી ભથ્થા (DA) માં ૨ ટકાનો વધારો કરવાની તૈયારી કરી રહી છે. હાલમાં કર્મચારીઓને ૫૮% ના દરે ડીએ મળી રહ્યું છે, જે હવે વધીને ૬૦% થવાની પૂરેપૂરી શક્યતા છે. આ વધારા બાદ લેવલ-૧ ના કર્મચારીઓનું લઘુત્તમ ડીએ વધીને ₹૧૦,૮૦૦ પ્રતિ માસ થઈ જશે. માર્ચની શરૂઆતમાં જ સરકાર આ અંગે સત્તાવાર જાહેરાત કરી શકે છે, જેનાથી તહેવારોના સમયે સરકારી કર્મચારીઓના ઘરના બજેટને મોટી રાહત મળશે.

આ વધારા પાછળનું મુખ્ય કારણ 'ઓલ ઇન્ડિયા કન્ઝ્યુમર પ્રાઈસ ઇન્ડેક્સ' (AICPI) ના લેટેસ્ટ આંકડા છે. ડિસેમ્બર ૨૦૨૫ સુધીના ડેટા મુજબ ગણતરી કરતા ડીએનો આંકડો ૬૦.૩૩% પર પહોંચે છે, જેનો અર્થ છે કે ૨ ટકાનો વધારો હવે માત્ર ઔપચારિકતા જ બાકી છે. સાતમા પગાર પંચના માળખા મુજબ, જે કર્મચારીઓનો મૂળ પગાર ₹૧૮,૦૦૦ છે, તેમને સીધો ફાયદો થશે. મહત્વની વાત એ છે કે આ વધારો ૧ જાન્યુઆરી ૨૦૨૬ થી અમલી ગણવામાં આવશે, એટલે કે કર્મચારીઓને જાન્યુઆરી અને ફેબ્રુઆરી મહિનાનું એરિયર્સ (બાકી રકમ) પણ માર્ચના પગાર સાથે રોકડમાં મળી શકે છે.

આ નિર્ણયનો લાભ માત્ર સેવારત કર્મચારીઓને જ નહીં, પરંતુ પેન્શનરોને પણ મોંઘવારી રાહત (DR) સ્વરૂપે મળશે. અંદાજે ૪૮ લાખ કેન્દ્રીય કર્મચારીઓ અને ૬૭ લાખ પેન્શનરો સહિત કુલ ૧ કરોડથી વધુ પરિવારોને આર્થિક બૂસ્ટર ડોઝ મળશે. ૮મા પગાર પંચની ચર્ચાઓ વચ્ચે સાતમા પગાર પંચ હેઠળનો આ સંભવિત વધારો કર્મચારીઓ માટે આશાનું કિરણ લઈને આવ્યો છે. હોળીના તહેવાર પર જ્યારે ખર્ચ વધતો હોય છે, ત્યારે સરકારના આ 'માસ્ટરસ્ટ્રોક' થી બજારમાં પણ નવી રોનક જોવા મળી શકે છે. હવે સૌની નજર કેબિનેટની આગામી બેઠક પર ટકેલી છે.