રાજકોટ : અમેરિકાની ઇમિગ્રેશન નીતિઓને લઈને હંમેશા ચર્ચાઓ થતી રહે છે, પરંતુ તાજેતરના એક ચોંકાવનારા અહેવાલે સાબિત કર્યું છે કે 'બિગ ટેક' કંપનીઓ H-1B વિઝાનો ઉપયોગ સસ્તા શ્રમ માટે નહીં, પરંતુ કૃત્રિમ બુદ્ધિ (AI) ના ક્ષેત્રમાં વૈશ્વિક નેતા બનવા માટે કરી રહી છે. નેશનલ ફાઉન્ડેશન ફોર અમેરિકન પોલિસીના વિશ્લેષણ મુજબ, નાણાકીય વર્ષ 2025 માં એમેઝોન, મેટા, ગૂગલ, માઇક્રોસોફ્ટ અને એપલ દ્વારા કરવામાં આવેલી નવી H-1B અરજીઓમાંથી 80% થી વધુ ભૂમિકાઓ સીધી રીતે AI સાથે જોડાયેલી છે.
ડેટા દર્શાવે છે કે આ પાંચ ટેક જાયન્ટ્સમાં સોફ્ટવેર ડેવલપર્સનો હિસ્સો 60% જેટલો છે, જે અન્ય અમેરિકાના નોકરીદાતાઓની સરખામણીએ ઘણો વધારે છે. આ કંપનીઓ માત્ર સામાન્ય આઈટી કામગીરી માટે નહીં, પરંતુ ડેટા સાયન્ટિસ્ટ, બિઝનેસ ઇન્ટેલિજન્સ એનાલિસ્ટ અને કોમ્પ્યુટર રિસર્ચ સાયન્ટિસ્ટ જેવી જટિલ અને વિશેષ ભૂમિકાઓ માટે વિદેશી પ્રતિભા પર નિર્ભર છે.
ભરતી પાછળનું ગણિત: $1 ટ્રિલિયનનું રોકાણ
આ ભરતીમાં વધારો થવાનું મુખ્ય કારણ આ કંપનીઓનું AI ક્ષેત્રે અધધ રોકાણ છે. અહેવાલો મુજબ, આ પાંચેય કંપનીઓ મળીને 2025 અને 2026 માં $1 ટ્રિલિયન (આશરે રૂ. 83 લાખ કરોડ) થી વધુનો ખર્ચ કરવાની તૈયારીમાં છે. એકલા એમેઝોને જ 2025 માં 4,644 જેટલી H-1B અરજીઓ મંજૂર કરાવીને યાદીમાં મોખરે સ્થાન મેળવ્યું છે.
આંતરરાષ્ટ્રીય વિદ્યાર્થીઓ: ટેક જગતની નવી આશા
અમેરિકન યુનિવર્સિટીઓમાં ભણતા આંતરરાષ્ટ્રીય વિદ્યાર્થીઓ આ પ્રતિભાની પાઇપલાઇનને જીવંત રાખી રહ્યા છે. આંકડા મુજબ, કોમ્પ્યુટર સાયન્સમાં 80% અને એન્જિનિયરિંગમાં 75% થી વધુ સ્નાતક વિદ્યાર્થીઓ વિદેશી મૂળના છે. નિષ્ણાતો ચેતવણી આપી રહ્યા છે કે જો અમેરિકા તેની ઇમિગ્રેશન નીતિઓ વધુ કડક બનાવશે, તો આ કંપનીઓ તેમની AI યોજનાઓ અટકાવવાને બદલે નોકરીઓ અમેરિકાની બહાર ખસેડવાનું પસંદ કરી શકે છે, જેની સીધી અસર અમેરિકાના અર્થતંત્ર પર પડી શકે છે.
 
બિગ ટેકમાં ટોચના H-1B નોકરીદાતાઓ (FY 2025)
કંપનીનું નામ    મંજૂર થયેલી અરજીઓ
એમેઝોન    4,644
મેટા પ્લેટફોર્મ્સ    1,555
માઇક્રોસોફ્ટ    1,394
ગૂગલ    1,050
એપલ    823