લખનૌ : આગામી વર્ષે યોજાનારી વિધાનસભા ચૂંટણીઓ પહેલા ઉત્તર પ્રદેશની યોગી આદિત્યનાથ સરકાર પોતાનું ૧૦મું અને અત્યાર સુધીનું સૌથી મોટું બજેટ રજૂ કરવા જઈ રહી છે. આશરે ૯ લાખ કરોડ રૂપિયાનું આ 'ચૂંટણીલક્ષી' બજેટ સમાજના દરેક વર્ગને ખુશ કરવા માટે તૈયાર કરવામાં આવ્યું હોય તેવું જણાય છે. નાણામંત્રી સુરેશ ખન્ના ૧૧ ફેબ્રુઆરીએ જ્યારે ગૃહમાં બજેટ રજૂ કરશે, ત્યારે તેમાં યુવાનો, મહિલાઓ, ખેડૂતો અને સરકારી કર્મચારીઓ માટે અનેક મોટી જાહેરાતો થવાની પૂરેપૂરી સંભાવના છે.
દીકરીઓને સ્કૂટર અને મહિલાઓને સન્માન
યોગી સરકાર આ વર્ષે તેના સંકલ્પ પત્રનું સૌથી મોટું વચન પૂરું કરવા જઈ રહી છે. ઉચ્ચ શિક્ષણ મેળવતી પ્રતિભાશાળી વિદ્યાર્થીનીઓને મફત સ્કૂટર આપવા માટે બજેટમાં મોટી જોગવાઈ કરવામાં આવશે. આ ઉપરાંત, ૬૦ વર્ષથી વધુ ઉંમરની મહિલાઓ માટે સરકારી બસોમાં મફત મુસાફરીની જાહેરાત પણ થઈ શકે છે. સામાજિક સુરક્ષાને મજબૂત કરવા માટે વૃદ્ધાવસ્થા, વિધવા અને વિકલાંગ પેન્શનની રકમ ₹૧,૦૦૦ થી વધારીને ₹૧,૫૦૦ પ્રતિ માસ કરવામાં આવશે.
શિક્ષામિત્રો અને પોલીસ વિભાગ માટે સારા સમાચાર
રાજ્યના ૧.૪૩ લાખથી વધુ શિક્ષામિત્રો માટે આ બજેટ ખુશીઓ લઈને આવી શકે છે. છેલ્લા ઘણા સમયથી પગાર વધારાની રાહ જોતા શિક્ષામિત્રોનું માનદ વેતન ₹૧૦,૦૦૦ થી વધારીને ₹૧૭,૦૦૦ થી ૨૦,૦૦૦ સુધી થઈ શકે છે. બીજી તરફ, રાજ્યની કાયદો અને વ્યવસ્થાને વધુ કડક બનાવવા માટે પોલીસ વિભાગને ₹૪૫,૦૦૦ કરોડની માતબર રકમ ફાળવવામાં આવશે, જેનો ઉપયોગ સાયબર ક્રાઈમ રોકવા અને આધુનિક વાહનોની ખરીદી માટે થશે.
માળખાગત સુવિધાઓ અને પરિવહન પર ભાર
વિકસિત ઉત્તર પ્રદેશના વિઝનને સાકાર કરવા માટે જાહેર બાંધકામ વિભાગ (PWD) ને ₹૪૨,૦૦૦ કરોડથી વધુ રકમ મળી શકે છે. રાજ્યમાં નવા એક્સપ્રેસ-વે, ફ્લાયઓવર અને ગામડાના રસ્તાઓનું જાળ બિછાવવામાં આવશે. જેવર એરપોર્ટ સહિતની અન્ય હવાઈ પટ્ટીઓ માટે ₹૨,૦૦૦ કરોડ અને ઇલેક્ટ્રિક બસોની ખરીદી માટે પણ બજેટમાં ખાસ જોગવાઈ હશે.
ખર્ચની ગતિ વધારવી પડશે
જોકે, વિપક્ષ અને નિષ્ણાતો એ વાત પર પણ નજર રાખી રહ્યા છે કે જાહેર કરેલા બજેટનો પૂરેપૂરો અમલ થાય. ગત વર્ષે PWD વિભાગે માત્ર ૪૦% અને આવાસ વિભાગે ૩૭% જ બજેટ વાપર્યું હોવાનું સામે આવ્યું છે. 'રાણી લક્ષ્મી બાઈ સ્કૂટી યોજના' જેવી જાહેરાતો હજુ કાગળ પર જ છે, ત્યારે આ વખતે સરકાર અમલીકરણ પર કેટલો ભાર મૂકે છે તે જોવું રહ્યું.