નવી દિલ્હી : ભારતના સરકારી શાસન વ્યવસ્થાને વધુ પારદર્શક, ઝડપી અને નાગરિક-કેન્દ્રિત બનાવવા માટે ચલાવવામાં આવી રહેલા 'રાષ્ટ્રીય કર્મયોગી મોટા પાયે જન સેવા કાર્યક્રમ' (તબક્કો-૨) આજે સફળતાપૂર્વક પૂર્ણ થયો છે. ક્ષમતા નિર્માણ આયોગ (CBC) દ્વારા આયોજિત આ અભિયાન હેઠળ દેશના આશરે ૧૦.૫ લાખ સરકારી કર્મચારીઓને આધુનિક અને સંવેદનશીલ કાર્યપ્રણાલી માટે સજ્જ કરવામાં આવ્યા છે.
આ કાર્યક્રમનો મુખ્ય હેતુ સરકારી કર્મચારીઓમાં માત્ર 'ફરજ' નહીં, પરંતુ 'સેવા ભાવ' અને 'સ્વધર્મ'ની ભાવના જાગૃત કરવાનો છે. મંત્રાલયના જણાવ્યા અનુસાર, આ તાલીમ માત્ર પુસ્તકિયા જ્ઞાન પૂરતી મર્યાદિત નહોતી, પરંતુ ઇન્ટરેક્ટિવ વર્તણૂકીય તાલીમ પર આધારિત હતી, જેથી કર્મચારીઓ સામાન્ય જનતા સાથે વધુ માનવીય અને સહયોગી અભિગમ સાથે કામ કરી શકે.
ટ્રેનર્સની વિશાળ સેના તૈયાર
કાર્મિક, જાહેર ફરિયાદ અને પેન્શન મંત્રાલયે આંકડા જાહેર કરતા જણાવ્યું કે, આ બીજા તબક્કામાં રાષ્ટ્રવ્યાપી સ્તરે ૮૨૨ લીડ ટ્રેનર્સ અને ૧૬,૦૦૦થી વધુ માસ્ટર ટ્રેનર્સનો એક મજબૂત સમૂહ તૈયાર કરવામાં આવ્યો છે. આ ટ્રેનર્સ અત્યાધુનિક શિક્ષણ પદ્ધતિઓથી સજ્જ છે, જેઓ ભવિષ્યમાં અન્ય કર્મચારીઓને પ્રવૃત્તિ-આધારિત શિક્ષણ આપી શકશે.
કેવી રીતે બદલાશે તમારો અનુભવ?
સામાન્ય રીતે સરકારી કચેરીઓમાં ફાઈલોના કામમાં થતા વિલંબ અને કર્મચારીઓના નિરુત્સાહી વલણની ફરિયાદો ઉઠતી હોય છે. 'મિશન કર્મયોગી' હેઠળ તાલીમ પામેલા આ ૧૦ લાખથી વધુ કર્મચારીઓ હવે નાગરિકોની જરૂરિયાતોને પ્રાથમિકતા આપશે. આ કાર્યક્રમ દ્વારા સરકાર એક એવું 'ન્યૂ ઇન્ડિયા' બનાવવા માંગે છે જ્યાં શાસન પ્રક્રિયા વધુ સરળ અને જનતા માટે સુલભ હોય.