એન્ટવર્પ : આજના આધુનિક યુગમાં આપણે મેટ્રો સ્ટેશન અને મોલ્સમાં સ્ટીલ અને કાચના બનેલા એસ્કેલેટર્સ જોતા હોઈએ છીએ. પરંતુ શું તમે ક્યારેય વિચાર્યું છે કે લાકડાનું બનેલું એસ્કેલેટર ૧૦૦ વર્ષ સુધી અવિરત ચાલી શકે? બેલ્જિયમમાં ઇજનેરીનો એક આવો જ અદભૂત અને દુર્લભ નમૂનો આજે પણ કાર્યરત છે, જે પ્રવાસીઓ માટે આકર્ષણનું કેન્દ્ર બન્યું છે.
નદીની નીચે છુપાયેલો ઇતિહાસ
બેલ્જિયમના એન્ટવર્પ શહેરમાં આવેલી સિન્ટ-અન્ના ટનલ (Sint-Anna Tunnel) માં આ ઐતિહાસિક એસ્કેલેટર્સ આવેલા છે. આ ટનલ શેલ્ડ્ટ નદીના તળિયેથી પસાર થાય છે અને શહેરના બે મહત્વના કિનારાઓને જોડે છે. વર્ષ ૧૯૩૩માં જ્યારે આ ટનલ લોકો માટે ખુલ્લી મૂકવામાં આવી, ત્યારે જ આ લાકડાના એસ્કેલેટર્સ સ્થાપિત કરવામાં આવ્યા હતા. નવાઈની વાત એ છે કે, બીજા વિશ્વયુદ્ધ જેવી અનેક ઘટનાઓ વીતી ગઈ હોવા છતાં, આ એસ્કેલેટર્સ આજે પણ મૂળ સ્થિતિમાં કાર્યરત છે.
શાહી દેખાવ અને અનોખી બનાવટ
આ એસ્કેલેટર તેની બનાવટ માટે જાણીતું છે. તેના પગથિયાં મજબૂત લાકડાના બનેલા છે, જ્યારે તેને સુશોભિત કરવા માટે પિત્તળ (Brass) નો ઉપયોગ કરવામાં આવ્યો છે. પિત્તળની ચમક અને લાકડાનો જૂનો લુક આ સ્થળને કોઈ મ્યુઝિયમ જેવો આભાસ કરાવે છે. અહીંથી પસાર થતા લોકો સ્ટીલની મશીનરીને બદલે લાકડાના પગથિયાં પર મુસાફરી કરવાનો એક અલગ જ રોમાંચ અનુભવે છે.
પ્રવાસીઓ માટે હોટસ્પોટ
સોશિયલ મીડિયાના યુગમાં આ જૂનું એસ્કેલેટર હવે વૈશ્વિક સ્તરે વાયરલ થયું છે. ઇન્સ્ટાગ્રામ અને ફેસબુક પર પ્રવાસીઓ આ એસ્કેલેટરના વીડિયો શેર કરી રહ્યા છે. વિશ્વમાં બહુ ઓછા એવા એસ્કેલેટર્સ બચ્યા છે જે લાકડાના હોય અને હજુ પણ સેવામાં હોય. જો તમે બેલ્જિયમની મુલાકાતે જાઓ, તો આ ૧૦૦ વર્ષ જૂની ટેકનોલોજી પર એક સવારી કરવાનું ભૂલતા નહીં!