નવી દિલ્હી: સંસદના બજેટ સત્રમાં આજે ત્યારે ભારે ખળભળાટ મચી ગયો જ્યારે વિપક્ષના નેતા રાહુલ ગાંધીએ સરકાર પર અત્યાર સુધીનો સૌથી ગંભીર આરોપ લગાવ્યો. ભારત અને અમેરિકા વચ્ચેના તાજેતરના વેપાર કરારને લઈને રાહુલ ગાંધીએ આકરા પ્રહારો કરતા કહ્યું કે સરકારે દેશના હિતોને અમેરિકા સામે ગીરવે મૂકી દીધા છે. આ નિવેદન આવતા જ સત્તા પક્ષના સાંસદો લાલચોળ થઈ ગયા હતા અને કેન્દ્રીય મંત્રી કિરેન રિજિજુએ તેનો જડબાતોડ જવાબ આપ્યો હતો.
 લોકસભામાં બોલતા રાહુલ ગાંધીએ સીધો હુમલો કરતા કહ્યું, "હું કહી રહ્યો છું કે તમે ભારતને વેચી દીધું છે. શું તમને ભારત માતાનો સોદો કરતા શરમ નથી આવતી?" તેમણે વધુમાં ઉમેર્યું કે આ કોઈ સામાન્ય શરણાગતિ નથી, પણ ૧.૪ અબજ ભારતીયોના ભવિષ્યનું સોદાગરણ છે. રાહુલે દાવો કર્યો કે ભાજપના નાણાકીય માળખાને બચાવવા માટે વડાપ્રધાનની આંખોમાં ડર દેખાઈ રહ્યો છે અને તેઓ અમેરિકા સામે ઝૂકી ગયા છે.
 કિરેન રિજિજુ: રાહુલ ગાંધીના આક્ષેપો સામે વાંધો ઉઠાવતા સંસદીય કાર્ય મંત્રી કિરેન રિજિજુએ સિંહગર્જના કરતા કહ્યું કે, "ભારત કોઈ વસ્તુ નથી કે તેને કોઈ ખરીદી કે વેચી શકે. દુનિયામાં હજુ એવો કોઈ જન્મ્યો નથી જે ભારત માતાનો સોદો કરી શકે." રિજિજુએ પીએમ મોદીનો બચાવ કરતા કહ્યું કે તેઓ દેશના અત્યાર સુધીના સૌથી મજબૂત વડાપ્રધાન છે અને રાહુલ ગાંધીના તમામ આરોપો પાયાવિહોણા છે.
રાહુલ ગાંધીએ પોતાની સ્પીચમાં તેલની ખરીદીનો મુદ્દો પણ ઉઠાવ્યો હતો. તેમણે સવાલ કર્યો કે, "શું હવે અમેરિકા નક્કી કરશે કે આપણે ક્યાંથી તેલ ખરીદવું? કોઈ પણ વડાપ્રધાને અત્યાર સુધી સાર્વભૌમત્વ સાથે આવો કરાર કર્યો નથી." તેમણે વધુમાં આરોપ લગાવ્યો કે સરકારે ભારતનું કૃષિ ક્ષેત્ર અમેરિકા માટે ખુલ્લું મૂકીને દેશના ખેડૂતો સાથે દગો કર્યો છે.
 રાહુલ ગાંધીના "દેશ વેચી દીધો" વાળા નિવેદન બાદ લોકસભામાં પક્ષ અને વિપક્ષ વચ્ચે જોરદાર નારેબાજી થઈ હતી. સત્તા પક્ષે રાહુલ ગાંધીના આ શબ્દોને સંસદીય મર્યાદાની બહાર ગણાવ્યા છે, જ્યારે કોંગ્રેસે આક્રમક રીતે પોતાના નેતાનો સાથ આપ્યો છે. આ શાબ્દિક યુદ્ધે સાબિત કરી દીધું છે કે આગામી દિવસોમાં આ વેપાર કરાર દેશના રાજકારણમાં મોટો મુદ્દો બનવાનો છે