ઓસ્લો : આંતરરાષ્ટ્રીય રાજદ્વારી દુનિયામાં અત્યારે નોર્વેના નામની જોરદાર ચર્ચા થઈ રહી છે, પણ કોઈ સિદ્ધિ માટે નહીં પરંતુ એક કાળા પ્રકરણ માટે. કુખ્યાત અમેરિકન સેક્સ ગુનેગાર જેફરી એપ્સ્ટેઇન સાથેના રહસ્યમય સંપર્કો ખુલતા જ સંયુક્ત રાષ્ટ્ર (UN) માં નોર્વેના પૂર્વ રાજદૂત અને હાલમાં જોર્ડનમાં સેવા આપતા મોના જુલે પદ પરથી રાજીનામું આપી દીધું છે. આ ઘટનાએ ઓસ્લોથી લઈને ન્યૂ યોર્ક સુધીના રાજકીય ગલિયારાઓમાં ખળભળાટ મચાવી દીધો છે.
$10 મિલિયનનું વસિયતનામું અને સસ્પેન્શન
આ વિવાદ ત્યારે વકર્યો જ્યારે એપ્સ્ટેઇને ૨૦૧૯માં જેલમાં આત્મહત્યા કરી તે પહેલાં તૈયાર કરેલા વસિયતનામામાં મોના જુલ અને તેમના પતિ ટેરિયે રોડ-લાર્સન માટે ૧૦ મિલિયન ડોલર (આશરે ૮૩ કરોડ રૂપિયા) છોડ્યા હોવાના અહેવાલો બહાર આવ્યા. વિદેશ મંત્રી એસ્પેન બાર્થ ઇડેએ આ રાજીનામાને "જરૂરી અને સાચું" ગણાવતા કહ્યું કે, એક ગુનેગાર સાથેના આવા સંપર્કો વિશ્વાસના પાયા હચમચાવી નાખે છે.
પતિ-પત્નીની જોડી અને ઓસ્લો કરાર
મોના જુલ અને તેમના પતિ ટેરિયે રોડ-લાર્સન કોઈ સામાન્ય વ્યક્તિઓ નથી. ૧૯૯૦ના દાયકામાં ઇઝરાયેલ અને પેલેસ્ટાઈન વચ્ચે થયેલા ઐતિહાસિક 'ઓસ્લો શાંતિ કરાર'માં આ જોડીએ મધ્યસ્થી તરીકે મુખ્ય ભૂમિકા ભજવી હતી. જોકે, હવે આ કદાવર નેતાઓ એપ્સ્ટેઇન સાથેના તેમના 'ખાનગી સંપર્કો' બદલ તપાસનો સામનો કરી રહ્યા છે. મોના જુલે સ્વીકાર્યું છે કે તેમણે આ સંપર્કને છુપાવવામાં ભૂલ કરી હતી, જોકે તેમણે દાવો કર્યો કે આ સંબંધ માત્ર તેમના પતિ દ્વારા જ હતો.
રાજવી પરિવાર અને પૂર્વ વડાપ્રધાન પણ લપેટામાં
માત્ર મોના જુલ જ નહીં, પણ 'એપ્સ્ટેઇન ફાઇલ્સ'ના નવા ખુલાસાઓએ નોર્વેના અન્ય મોટા માથાઓને પણ મુશ્કેલીમાં મૂક્યા છે:
•    ક્રાઉન પ્રિન્સેસ મેટ્ટે-મેરિટ: નોર્વેના રાજકુમારીએ એપ્સ્ટેઇન સાથેના તેમના ભૂતકાળના સંબંધો બદલ સત્તાવાર રીતે માફી માંગી છે.
•    થોર્બજોર્ન જેગલેન્ડ: નોર્વેના પૂર્વ વડાપ્રધાન અને નોબેલ શાંતિ પુરસ્કાર સમિતિના પૂર્વ વડા વિરુદ્ધ પણ ભ્રષ્ટાચાર અને એપ્સ્ટેઇન સાથેના કનેક્શનને લઈને તપાસ શરૂ કરવામાં આવી છે.
તપાસનો વ્યાપ વધ્યો
નોર્વેના વિદેશ મંત્રાલયે હવે ન્યૂ યોર્ક સ્થિત થિંક ટેન્ક 'ઇન્ટરનેશનલ પીસ ઇન્સ્ટિટ્યૂટ' ને અપાતા ફંડની પણ સમીક્ષા શરૂ કરી છે, જેનું નેતૃત્વ મોના જુલના પતિ લાર્સન કરી રહ્યા હતા. શું આ શાંતિ પ્રયાસોની આડમાં કોઈ મોટું આર્થિક કૌભાંડ હતું? તે પ્રશ્ન અત્યારે આખા યુરોપમાં ચર્ચાઈ રહ્યો છે.
જેફરી એપ્સ્ટેઇન ભલે દુનિયામાં નથી, પણ તેની ફાઇલો આજે પણ વિશ્વના શક્તિશાળી દેશોની સરકારોને હચમચાવી રહી છે.