નવી દિલ્હી: રાજધાની દિલ્હીના પીરાગઢી ફ્લાયઓવર પાસે રવિવારે એક બંધ કારમાંથી મળી આવેલા ત્રણ મૃતદેહોના કેસમાં દિલ્હી પોલીસે ચોંકાવનારો ખુલાસો કર્યો છે. આ કોઈ આત્મહત્યા કે અકસ્માત નહીં, પણ 'સંપત્તિનો વરસાદ' કરાવવાની લાલચ આપીને આચરવામાં આવેલું ઠંડા કલેજે ટ્રિપલ મર્ડર હતું. પોલીસે આ મામલે ઉત્તર પ્રદેશના ફિરોઝાબાદના કુખ્યાત તાંત્રિક કમરુદ્દીન ઉર્ફે બાબાની ધરપકડ કરી છે.
ઝેરી લાડુ અને મોતની મુસાફરી
પોલીસ તપાસમાં બહાર આવ્યું છે કે આરોપી કમરુદ્દીન લોકોને તાંત્રિક વિધિ દ્વારા રાતોરાત અમીર બનાવવાની જાળમાં ફસાવતો હતો. તેણે મૃતક લક્ષ્મી, શિવ નરેશ અને રણધીરને 'ધન સ્નાન' વિધિ માટે લોની બોલાવ્યા હતા અને સાથે ૨ લાખ રૂપિયા રોકડા તથા દારૂ લાવવા જણાવ્યું હતું. લોનીથી પરત ફરતી વખતે તાંત્રિક પોતે કારમાં તેમની સાથે બેઠો હતો. રસ્તામાં તેણે ત્રણેયને નશીલા પીણાં અને ઝેર ભેળવેલા 'પ્રસાદના લાડુ' ખવડાવ્યા હતા. ત્રણેય બેભાન થઈ જતાં તાંત્રિક ૨ લાખ રૂપિયાની રોકડ લઈને ફરાર થઈ ગયો હતો.
ટેકનિકલ પુરાવાઓએ ખોલી પોલ
શરૂઆતમાં આ કેસ ગૂંચવાયેલો હતો, પરંતુ સીસીટીવી ફૂટેજ અને મોબાઈલ લોકેશનના આધારે પોલીસે જોયું કે કારમાં ચોથો વ્યક્તિ પણ હાજર હતો. તપાસમાં જાણવા મળ્યું કે આ ત્રણેય વ્યક્તિઓ સતત કમરુદ્દીન બાબાના સંપર્કમાં હતા. પોલીસે જ્યારે કમરુદ્દીનની કડક પૂછપરછ કરી ત્યારે તે ભાંગી પડ્યો અને પોતાનો ગુનો કબૂલી લીધો. આરોપી અગાઉ પણ રાજસ્થાન અને યુપીમાં અનેક ગુનાહિત કેસોમાં સંડોવાયેલો રીઢો ગુનેગાર હોવાનું બહાર આવ્યું છે.
કોણ હતા આ કમનસીબ મૃતકો?
૮ ફેબ્રુઆરીએ પીરાગઢી ફ્લાયઓવર પરથી સફેદ રંગની કારમાં જે ત્રણ મૃતદેહો મળ્યા હતા, તેમાં ૭૬ વર્ષીય રણધીર (પ્રોપર્ટી ડીલર), ૪૨ વર્ષીય શિવ નરેશ અને ૪૦ વર્ષીય લક્ષ્મી દેવીનો સમાવેશ થાય છે. પરિવારે શરૂઆતથી જ હત્યાની શંકા વ્યક્ત કરી હતી. કારમાંથી દારૂની બોટલો અને ખાલી ગ્લાસ મળી આવ્યા હતા, જે તાંત્રિકે વિધિના ભાગરૂપે પીવડાવ્યા હોવાનું ખુલ્યું છે.
પોલીસની ચેતવણી
દિલ્હી પોલીસે આ ઘટના બાદ લોકોને અપીલ કરી છે કે અંધશ્રદ્ધા અને રાતોરાત અમીર બની જવાની લાલચમાં આવી પાખંડી તાંત્રિકો કે અજાણ્યા લોકો પર વિશ્વાસ ન કરવો. હાલમાં પોલીસે આરોપી વિરુદ્ધ હત્યા અને લૂંટની કલમો હેઠળ ગુનો નોંધી વધુ તપાસ હાથ ધરી છે.