અમદાવાદ: જો તમે પણ એડવેન્ચર મોટરસાઇકલના શોખીન છો અને તમારી પાસે BMW GS સિરીઝની બાઇક છે, તો તમારા માટે એક શાનદાર સમાચાર છે. લક્ઝરી બાઇક નિર્માતા કંપની BMW Motorrad એ ભારતમાં તેના ગ્રાહકો માટે 'GS એક્સપિરિયન્સ 2026' રાઇડર ટ્રેનિંગ પ્રોગ્રામની જાહેરાત કરી છે. આ કાર્યક્રમ માત્ર એક ઇવેન્ટ નથી, પરંતુ સાહસ, સલામતી અને અત્યાધુનિક તાલીમનું એક અનોખું મિશ્રણ છે, જે તમને સામાન્ય રાઇડરમાંથી એક 'પ્રો-રાઇડર' બનાવશે.
બે સ્તરમાં અપાશે પ્રોફેશનલ ટ્રેનિંગ
આ બે દિવસીય તાલીમ કાર્યક્રમને લેવલ-૧ અને લેવલ-૨ એમ બે ભાગમાં વહેંચવામાં આવ્યો છે.
•    લેવલ ૧: આમાં નવા રાઇડર્સને બાઇકનું સંતુલન, રાઇડિંગ પોઝિશન, ઇમરજન્સી બ્રેકિંગ અને ઢોળાવ પર બાઇકને કેવી રીતે કંટ્રોલ કરવી તેની પાયાની સમજ આપવામાં આવશે.
•    લેવલ ૨: જે રાઇડર્સ લેવલ-૧ પાસ કરશે તેમને રેતી, કાદવ અને પથરાળ રસ્તાઓ પર એડવાન્સ્ડ દાવપેચ શીખવવામાં આવશે. આ સ્તરે રાઇડર્સને બાઇકની 'એન્ડુરો પ્રો' ટેકનોલોજીનો ઉપયોગ કરવાનું પણ શીખવવામાં આવશે.
પહેલીવાર સમાંતર ટ્રેક પર તાલીમ
GS એક્સપિરિયન્સ ૨૦૨૬ની સૌથી મોટી ખાસિયત એ છે કે આ વખતે પ્રથમવાર બે અલગ-અલગ કેટેગરી માટે સમાંતર ટ્રેક હશે. એક ટ્રેક પર ૩૧૦ સીસીના રાઇડર્સ હશે, જ્યારે બીજા ટ્રેક પર ૬૫૦ સીસી કે તેથી વધુ પાવરફુલ બાઇક્સ (કોર રાઇડર્સ) ના કૌશલ્યોની કસોટી થશે. અમદાવાદમાં સપ્ટેમ્બર ૨૦૨૬માં આ રોમાંચક કાર્યક્રમ યોજાવા જઈ રહ્યો છે.
સલામતી અને શિસ્ત સર્વોપરી
કંપનીએ સ્પષ્ટ કર્યું છે કે આ તાલીમમાં ભાગ લેવા માટે માન્ય ડ્રાઇવિંગ લાયસન્સ હોવું અનિવાર્ય છે. ઉપરાંત, રાઇડર્સ માટે હેલ્મેટ, ગ્લોવ્સ, રાઇડિંગ જેકેટ અને એન્ડુરો બૂટ્સ જેવા સંપૂર્ણ ગિયર પહેરવા ફરજિયાત છે. નિષ્ણાત ઇન્સ્ટ્રક્ટર્સની દેખરેખ હેઠળ રાઇડર્સને તેમની બાઇકની ઇલેક્ટ્રોનિક સિસ્ટમ્સનો શ્રેષ્ઠ ઉપયોગ કેવી રીતે કરવો તે લાઈવ ડેમો દ્વારા શીખવવામાં આવશે.
ક્યારે અને ક્યાં થશે નોંધણી?
આ તાલીમ કાર્યક્રમની શરૂઆત ફેબ્રુઆરી ૨૦૨૬માં ચંદીગઢથી થશે અને ત્યારબાદ દિલ્હી, મુંબઈ, બેંગલુરુ અને સપ્ટેમ્બરમાં અમદાવાદમાં આ જાદુ છવાશે. જો તમે પણ આ સાહસિક સમુદાયનો હિસ્સો બનવા માંગતા હોવ, તો તમારી નજીકની અધિકૃત BMW Motorrad ડીલરશીપ પર જઈને નોંધણી કરાવી શકો છો. યાદ રાખજો, બેઠકો મર્યાદિત છે અને 'વહેલા તે પહેલા' ના ધોરણે પ્રવેશ આપવામાં આવશે.