નવી દિલ્હી : સુપ્રીમ કોર્ટે દેશભરમાં ૧૪ વર્ષથી ઓછી ઉંમરના બાળકોને ધાર્મિક શિક્ષણ આપતી સંસ્થાઓ અને મદરેસાઓની નોંધણી ફરજિયાત કરવાની માંગ કરતી અરજી પર સુનાવણી કરવાનો ઇનકાર કર્યો છે. અશ્વિની ઉપાધ્યાય દ્વારા દાખલ કરવામાં આવેલી આ અરજીમાં 'રાષ્ટ્રીય સુરક્ષા' અને 'બાળકોના માનસિક ઘડતર'ને લઈને ગંભીર ચિંતાઓ વ્યક્ત કરવામાં આવી હતી, પરંતુ કોર્ટે અરજદારને પહેલા સરકારનો સંપર્ક કરવાની સ્વતંત્રતા આપી છે.
 બ્રેઈનવોશિંગ અને રાષ્ટ્રીય સુરક્ષા: અરજદાર વતી હાજર રહેલા વરિષ્ઠ વકીલ ગોપાલ શંકરનારાયણને દલીલ કરી હતી કે બાળકો દેશની કરોડરજ્જુ છે. નાની ઉંમરે બાળકો ભોળા હોય છે અને ધાર્મિક મગજ ધોવાનો શિકાર સરળતાથી બની શકે છે. અરજીમાં એવી માંગ કરવામાં આવી હતી કે ૬ થી ૧૪ વર્ષના બાળકોને ફરજિયાત મફત શિક્ષણ (કલમ ૨૧-એ) મળવું જોઈએ, તેની જગ્યાએ તેમને સમાંતર ધાર્મિક શિક્ષણ પ્રણાલીમાં મોકલવા એ તેમના મૂળભૂત અધિકારનું ઉલ્લંઘન છે.
 સુનાવણી દરમિયાન જસ્ટિસ દીપાંકર દત્તાએ પશ્ચિમ બંગાળની સ્થિતિનો ઉલ્લેખ કરતા કહ્યું કે, "ત્યાં માત્ર નોંધણી જેવું કંઈ નથી, પણ એક મજબૂત મદરેસા શિક્ષણ બોર્ડ છે. દરેક મદરેસાએ ત્યાં નોંધણી કરાવવી પડે છે, નહીં તો તેઓ વિદ્યાર્થીઓને પરીક્ષામાં બેસાડી શકતા નથી." કોર્ટે ભારપૂર્વક કહ્યું કે આ બાબતે પહેલા કાર્યપાલિકાએ (સરકારે) તપાસ કરવી જોઈએ અને એસઓપી (SOP) ઘડવી જોઈએ.
અરજીમાં બંધારણની કલમ ૩૦ (લઘુમતી સંસ્થાઓના અધિકાર) અને કલમ ૧૯ ના અર્થઘટન પર પણ સવાલ ઉઠાવ્યા હતા. અરજદારનો તર્ક હતો કે ધાર્મિક શિક્ષણ આપતી સંસ્થાઓ કલમ ૩૦ હેઠળ નહીં પણ કલમ ૨૬ હેઠળ આવવી જોઈએ. વકીલે કોર્ટને પૂછ્યું કે, "શું આપણે બાળકોને આધુનિક અને બિનસાંપ્રદાયિક શિક્ષણથી વંચિત રાખીને માત્ર ધાર્મિક શિક્ષણના ભરોસે છોડી શકીએ?"
ન્યાયાધીશ દીપાંકર દત્તા અને એસ.સી. શર્માની બેન્ચે અરજદારને અરજી પાછી ખેંચવાની પરવાનગી આપી હતી. કોર્ટે સ્પષ્ટ કર્યું કે અરજદારે પહેલા સરકાર અને સંબંધિત અધિકારીઓ સમક્ષ પોતાની રજૂઆત કરવી જોઈએ. જો ત્યાંથી સંતોષકારક ઉકેલ ન આવે, તો જ કોર્ટ આ બાબતે વિચારણા કરશે.
આ ચુકાદો એવા સમયે આવ્યો છે જ્યારે અલ્હાબાદ અને કેરળ હાઈકોર્ટ દ્વારા મદરેસા શિક્ષણ અંગે પરસ્પર વિરોધી ચુકાદાઓ આપવામાં આવ્યા છે, જેના કારણે આ વિવાદ હવે વધુ ઘેરો બન્યો છે.