રાજકોટ : ભારતીય શેરબજારમાં આજે એક મોટો ઉલટફેર જોવા મળ્યો છે. દેશની સૌથી મોટી જાહેર ક્ષેત્રની બેંક, સ્ટેટ બેંક ઓફ ઇન્ડિયા (SBI) એ માર્કેટ કેપિટલાઇઝેશનની રેસમાં આઈટી દિગ્ગજ ટાટા કન્સલ્ટન્સી સર્વિસીસ (TCS) ને પાછળ છોડી દીધી છે. આ સાથે જ SBI હવે રિલાયન્સ, HDFC બેંક અને ભારતી એરટેલ પછી ભારતની ચોથી સૌથી મોટી લિસ્ટેડ કંપની બની ગઈ છે.
બુધવાર, ૧૧ ફેબ્રુઆરીના રોજ ટ્રેડિંગ સેશન દરમિયાન SBIના શેરમાં રોકાણકારોએ ભારે લેવાલી કરી હતી. દિવસના અંતે શેરનો ભાવ ૩.૨૩% વધીને ₹૧,૧૮૧.૧૦ પર બંધ રહ્યો હતો. ગયા અઠવાડિયે શુક્રવારે આ શેર ₹૧,૦૬૬ પર હતો, જે માત્ર ગણતરીના દિવસોમાં જ મોટી છલાંગ લગાવી ચુક્યો છે. બેંકના શાનદાર ત્રિમાસિક પરિણામો અને મજબૂત બેલેન્સ શીટને કારણે રોકાણકારોનો વિશ્વાસ વધ્યો છે.
 અત્યાર સુધી માર્કેટ કેપમાં રિલાયન્સ અને TCS વચ્ચે સ્પર્ધા રહેતી હતી, પરંતુ SBIએ આ વખતે બાજી મારી લીધી છે. આ સિદ્ધિ દર્શાવે છે કે રોકાણકારો હવે આઈટી સેક્ટર કરતા બેંકિંગ સેક્ટર, ખાસ કરીને સરકારી બેંકો પર વધુ ભરોસો મૂકી રહ્યા છે. બજારના નિષ્ણાતો માને છે કે જો તેજીનો આ ટ્રેન્ડ ચાલુ રહેશે, તો આવતીકાલે પણ શેરમાં જોરદાર ઉછાળો જોવા મળી શકે છે.
 બજારના વિશ્લેષકોના જણાવ્યા અનુસાર, SBIના શેર માટે આગામી સમય ખૂબ જ ઉજળો છે. આવતીકાલે એટલે કે ગુરુવારે પણ શેરના ભાવમાં વધારો થવાની સંભાવના છે. જે રીતે બેંકની લોન બુકમાં વૃદ્ધિ થઈ રહી છે અને NPAમાં ઘટાડો થયો છે, તે જોતા લાંબા ગાળાના રોકાણકારો માટે આ શેર 'ગોલ્ડન એગ' સાબિત થઈ શકે તેમ છે. બેંકિંગ ક્ષેત્રની આ તેજીએ સમગ્ર શેરબજારમાં ઉત્સાહનો માહોલ ભરી દીધો છે. હવે જોવાનું એ રહેશે કે SBI આ ચોથું સ્થાન કેટલા સમય સુધી જાળવી રાખે છે.