નવી દિલ્હી | તા.12: ટેક જાયન્ટ ગૂગલ હવે તમારા મુસાફરીના અનુભવને ધરમૂળથી બદલવા જઈ રહ્યું છે. જો તમને ગૂગલ મેપ્સ પર યોગ્ય લોકેશન શોધવામાં મુશ્કેલી પડતી હોય અથવા ‘નજીકની રેસ્ટોરન્ટ’ જેવા કીવર્ડ્સ ટાઈપ કરીને કંટાળી ગયા હોવ, તો હવે તમારા માટે ખુશીના સમાચાર છે. ગૂગલ મેપ્સમાં ટૂંક સમયમાં જ આર્ટિફિશિયલ ઈન્ટેલિજન્સ (AI) આધારિત ‘Ask Maps’ નામનું નવું ચેટ ફીચર ઉમેરવામાં આવશે. આ ફીચરની મદદથી તમે મેપ્સ સાથે એક સામાન્ય મિત્રની જેમ વાતચીત કરી શકશો.
હવે ‘કીવર્ડ્સ’ ભૂલી જાઓ, ‘વાત’ કરો
અત્યાર સુધી આપણે મેપ્સ પર “શાંત કાફે” કે “સસ્તા કપડાંની દુકાન” જેવા ટૂંકા શબ્દો સર્ચ કરતા હતા, પરંતુ હવે તમે આખું વાક્ય લખી શકશો. જેમ કે, “મારા પરિવાર સાથે બેસવા માટે નજીકમાં એક સરસ અને શાંત રેસ્ટોરન્ટ ક્યાં છે?” મેપ્સ તમારા આખા વાક્યનો અર્થ સમજીને તમને શ્રેષ્ઠ વિકલ્પો બતાવશે. આ સુવિધા ગૂગલના શક્તિશાળી ‘Gemini AI’ પર આધારિત છે, જે તેને સામાન્ય સર્ચ એન્જિન કરતા વધુ બુદ્ધિશાળી બનાવે છે.
ચેટ વિન્ડોમાં જ મળશે તમામ જવાબો
Ask Maps ફીચર કેવી રીતે કામ કરશે તે અંગેની વિગતો મુજબ, સર્ચ બારની નીચે એક નાનું જેમિની આઈકોન જોવા મળશે. તેના પર ટેપ કરતા જ એક ચેટ વિન્ડો ખુલશે. તમારે લોકેશન જોવા માટે અલગ-અલગ ટેબમાં જવાની જરૂર નહીં પડે, બધી જ માહિતી એક જ સ્ક્રીન પર દેખાશે. આ નવું ફીચર હવામાનના આધારે ફરવા લાયક સ્થળો કે ડેટ પર જવા માટેની બેસ્ટ જગ્યાઓ પણ સજેસ્ટ કરી શકશે.
તમારા ખિસ્સામાં હશે ડિજિટલ ગાઈડ
ગૂગલનું આ નવું પગલું મેપ્સને માત્ર એક રૂટ-પ્રોવાઈડર ટૂલમાંથી બદલીને ‘લાઈવ આસિસ્ટન્ટ’ બનાવી દેશે. જોકે, આ સુવિધા હાલમાં ડેવલપમેન્ટ સ્ટેજમાં છે અને ગૂગલે તેની સત્તાવાર લોન્ચ ડેટ જાહેર કરી નથી. પરંતુ જો આ ફીચર રોલ-આઉટ થશે, તો મોબાઈલ પર મુસાફરીનું પ્લાનિંગ કરવું અને અજાણ્યા શહેરમાં મનપસંદ જગ્યાઓ શોધવી પહેલા કરતા અનેકગણી સરળ બની જશે. ડિજિટલ દુનિયામાં આ એક મોટી ક્રાંતિ સાબિત થઈ શકે છે.