નવી દિલ્હી | તા.12: દિલ્હી એક્સાઇઝ પોલિસી (દારૂ કૌભાંડ) કેસમાં આમ આદમી પાર્ટીના સંયોજક અરવિંદ કેજરીવાલ માટે રાહતના સમાચાર લાંબો સમય ટક્યા નહીં. એન્ફોર્સમેન્ટ ડિરેક્ટોરેટ (ED) એ સ્પષ્ટ સંકેત આપ્યા છે કે તે કેજરીવાલને ઘેરવા માટે કોઈ કસર બાકી રાખશે નહીં. એજન્સીએ દિલ્હી હાઈકોર્ટને જાણ કરી છે કે તે નીચલી અદાલતના એ આદેશને પડકારશે, જેમાં કેજરીવાલને EDના સમન્સની અવગણના કરવા બદલ બે કેસમાં નિર્દોષ જાહેર કરવામાં આવ્યા હતા.
કેમ ફરી ભીંસમાં આવ્યા કેજરીવાલ?
ગુરુવારે દિલ્હી હાઈકોર્ટમાં થયેલી સુનાવણી દરમિયાન એડિશનલ સોલિસિટર જનરલ એસ.વી. રાજુએ એજન્સીનો પક્ષ રાખતા કહ્યું હતું કે, ટ્રાયલ કોર્ટના 22 જાન્યુઆરીના નિર્ણય સામે અપીલ દાખલ કરવામાં આવશે. આ કેસ ત્યારે ઉભો થયો હતો જ્યારે EDએ દારૂ કૌભાંડની તપાસ માટે કેજરીવાલને વારંવાર સમન્સ મોકલ્યા હતા, પરંતુ તેઓ તપાસમાં જોડાયા નહોતા. EDનો દાવો છે કે આ સમન્સનો અનાદર કાયદાનું ઉલ્લંઘન છે, જ્યારે નીચલી કોર્ટે માન્યું હતું કે કેજરીવાલે ઇરાદાપૂર્વક આવું કર્યું હોય તેવું સાબિત નથી થયું.
હાઈકોર્ટ અને ધરપકડનો ઘટનાક્રમ
ઉલ્લેખનીય છે કે, 20 માર્ચ 2024ના રોજ હાઈકોર્ટે કેજરીવાલને કોઈ વચગાળાની રાહત આપવાનો ઈન્કાર કર્યો હતો, જેના થોડા જ કલાકો બાદ EDએ તેમની ધરપકડ કરી હતી. હાલમાં તેઓ મની લોન્ડરિંગ કેસમાં વચગાળાના જામીન પર છે. કેજરીવાલના વકીલોએ દલીલ કરી હતી કે જ્યારે નીચલી કોર્ટે તેમને સમન્સના ભંગ બદલ નિર્દોષ જાહેર કરી દીધા છે, ત્યારે અગાઉની અરજીઓ ચલાવવાનો કોઈ અર્થ નથી. પરંતુ ED હવે આ ચુકાદાને જ પલટાવવાની તૈયારી કરી રહી છે.
રાજકીય ગરમાવો અને EDના આક્ષેપો
EDનો આરોપ છે કે નવી એક્સાઇઝ નીતિ ઘડવા પાછળ કેજરીવાલ અને અન્ય આરોપીઓનો સીધો સંપર્ક હતો, જેનો હેતુ ચોક્કસ લોકોને આર્થિક ફાયદો કરાવવાનો હતો. બીજી તરફ, કેજરીવાલે PMLA (મની લોન્ડરિંગ વિરોધી કાયદો) ની કેટલીક જોગવાઈઓને જ પડકારી છે. એજન્સી હવે આ મામલે કડક વલણ અપનાવી રહી છે, જેનો અર્થ એ છે કે આગામી દિવસોમાં કોર્ટમાં દલીલોનો વધુ એક રાઉન્ડ શરૂ થશે અને રાજકીય ઘમસાણ પણ તેજ બનશે.