નવી દિલ્હી | તા.12: ભૂતપૂર્વ આર્મી ચીફ જનરલ એમ.એમ. નરવણેનું પુસ્તક અત્યારે દેશના રાજકારણ અને સંરક્ષણ જગતમાં ચર્ચાનો વિષય બન્યું છે. પુસ્તક હજુ બજારમાં આવ્યું નથી, છતાં તેના કેટલાક અંશો કેવી રીતે લીક થઈ ગયા, તે હવે એક મોટો તપાસનો વિષય બન્યો છે. દિલ્હી પોલીસના સ્પેશિયલ સેલે આ મામલે હવે 'ક્રિમિનલ કોન્સ્પિરસી' એટલે કે ગુનાહિત ષડયંત્રની કલમો ઉમેરીને પ્રકાશક કંપની 'પેંગ્વિન ઇન્ડિયા'ના પ્રતિનિધિઓની સઘન પૂછપરછ શરૂ કરી છે.
15 સવાલ અને રહસ્યમય હસ્તપ્રત
પોલીસ સૂત્રોના જણાવ્યા અનુસાર, સ્પેશિયલ સેલે પેંગ્વિન ઇન્ડિયા સામે 15 મહત્વના પ્રશ્નોની યાદી મૂકી છે. આ પ્રશ્નોમાં મુખ્યત્વે એ જાણવાનો પ્રયાસ કરવામાં આવ્યો છે કે, પુસ્તકની હસ્તપ્રત (Manuscript) કોના-કોના હાથમાં હતી? ડિજિટલ રીતે તે કોને મોકલવામાં આવી હતી અને એડિટિંગ દરમિયાન સુરક્ષાના કયા માપદંડો જાળવવામાં આવ્યા હતા? પોલીસ અત્યારે એ જાણવા માટે મથી રહી છે કે આ ઘટના કોઈ આંતરિક બેદરકારી છે કે પછી સરકારને ઘેરવા માટે જાણીજોઈને કરવામાં આવેલું કોઈ 'કાવતરું'.
રાજકીય ગરમાવો અને રાહુલ ગાંધીનો ઉલ્લેખ
આ વિવાદ ત્યારે વધુ વકર્યો જ્યારે કોંગ્રેસ નેતા રાહુલ ગાંધીએ લોકસભામાં આ અપ્રકાશિત પુસ્તકના કેટલાક અંશોનો ઉલ્લેખ કરીને કેન્દ્ર સરકાર પર આકરા પ્રહાર કર્યા હતા. સવાલ એ ઊભો થાય છે કે જો પ્રકાશક પોતે કહે છે કે પુસ્તક હજુ છાપવામાં જ આવ્યું નથી અને તેની કોઈ ડિજિટલ કોપી જાહેર કરવામાં આવી નથી, તો તેના અંશો વિપક્ષ સુધી પહોંચ્યા કેવી રીતે? આ જ પ્રશ્નનો જવાબ અત્યારે દિલ્હી પોલીસ શોધી રહી છે.
ડિજિટલ ટ્રેલની શોધ
તપાસ એજન્સી અત્યારે ટેકનિકલ પુરાવાઓનું વિશ્લેષણ કરી રહી છે. પેંગ્વિન ઇન્ડિયાના પ્રતિનિધિઓએ કેટલાક પ્રશ્નોના જવાબ આપ્યા છે, પરંતુ કેટલાક મુદ્દાઓ પર તેમણે વધુ સમય માંગ્યો છે. પોલીસ એ જાણવા માંગે છે કે શું આ હસ્તપ્રત કોઈ ચોક્કસ વ્યક્તિ દ્વારા 'લીક' કરવામાં આવી હતી કે સર્વરમાંથી ડેટા ચોરી કરવામાં આવ્યો હતો? તપાસ પૂર્ણ થયા બાદ જ જવાબદારી નક્કી કરવામાં આવશે, પરંતુ અત્યારે તો આ પુસ્તક પ્રકાશિત થયા પહેલા જ મોટા વિવાદમાં ફસાઈ ગયું છે.