નવી દિલ્હી:ભારત અને અમેરિકા વચ્ચેના વ્યાપારિક સંબંધોમાં એક નવો અધ્યાય શરૂ થવા જઈ રહ્યો છે. ડોનાલ્ડ ટ્રમ્પ વહીવટીતંત્ર તરફથી ભારતને વધુ એક મોટી રાહત મળવાના સંકેત મળ્યા છે. કેન્દ્રીય વાણિજ્ય મંત્રી પિયૂષ ગોયલે આજે જાહેરાત કરી હતી કે, ભારત-અમેરિકા વ્યાપાર સોદા અંતર્ગત ભારતના કાપડ ક્ષેત્રને વિશેષ ફાયદો મળી શકે છે. અમેરિકા ભારતીય કાપડ પરની આયાત ડ્યૂટી ઘટાડીને ‘ઝીરો ટેરિફ’ કરી શકે છે, જે અત્યાર સુધી બાંગ્લાદેશ જેવા દેશોને મળતી સમાન સુવિધા છે.
 કેન્દ્રીય મંત્રીએ જણાવ્યું હતું કે, ભારતીય કાપડ ઉદ્યોગને અત્યાર સુધી અમેરિકામાં પ્રવેશવા માટે ઊંચી ડ્યૂટી ચૂકવવી પડતી હતી, જ્યારે બાંગ્લાદેશને કેટલીક છૂટછાટો મળતી હતી. હવે, આ નવા સોદા સાથે ભારતને પણ અમેરિકામાં એ જ સ્તરનો વ્યાપારિક લાભ મળશે. આનાથી ભારતના કાપડ નિકાસમાં ધરખમ વધારો થશે અને વૈશ્વિક બજારમાં ભારતની પકડ મજબૂત બનશે.
 આ વ્યાપારિક સમજૂતી માત્ર કાપડ પૂરતી મર્યાદિત નથી. આ ડીલથી ભારતની કુલ નિકાસમાં $૧૦૦ બિલિયનનો વધારો થવાની અને જીડીપી (GDP) માં મોટો ઉછાળો આવવાની અપેક્ષા છે. પિયૂષ ગોયલે સ્પષ્ટ કર્યું હતું કે, ટ્રમ્પ વહીવટીતંત્ર સાથેની વાટાઘાટોમાં ભારતની ‘લાલ રેખા’ (Red Lines) એટલે કે રાષ્ટ્રીય હિતો સાથે કોઈ બાંધછોડ કરવામાં આવી નથી, છતાં બંને દેશો આર્થિક રીતે એકબીજાની નજીક આવી રહ્યા છે.
ભારતના કાપડ ક્ષેત્ર માટે આ સમાચાર બૂસ્ટર ડોઝ સમાન છે. ટેક્સ ફ્રી એન્ટ્રી મળવાથી સુરત, લુધિયાણા, તિરુપુર અને અમદાવાદ જેવા કાપડ હબમાં ઉત્પાદન વધશે, જેનાથી દેશમાં રોજગારની લાખો નવી તકો ઉભી થશે. આગામી દિવસોમાં આ સોદા અંગેની અંતિમ રૂપરેખા જાહેર થતાં જ ભારતીય શેરબજારના ટેક્સટાઇલ સેક્ટરમાં પણ તેજી જોવા મળી શકે છે.