ઢાકા: બાંગ્લાદેશમાં શેખ હસીનાના શાસનના અંત બાદ આજે દેશની ૧૩મી રાષ્ટ્રીય સંસદીય ચૂંટણી અને ‘જુલાઈ રાષ્ટ્રીય ચાર્ટર’ પર ઐતિહાસિક મતદાન પ્રક્રિયા પૂર્ણ થઈ છે. સવારે ૭:૩૦ થી સાંજે ૪:૩૦ વાગ્યા સુધી ચાલેલા આ મતદાન બાદ હવે સમગ્ર દેશમાં ભારે ઉત્તેજના વચ્ચે મતગણતરીનો ધમધમાટ શરૂ થઈ ગયો છે. આ ચૂંટણી પાડોશી દેશ માટે માત્ર સત્તા પરિવર્તન જ નહીં, પરંતુ નવી લોકશાહીના પાયા સમાન માનવામાં આવી રહી છે.
શાંતિપૂર્ણ માહોલ વચ્ચે હિંસાના છાંટા
ચૂંટણી પંચના જણાવ્યા મુજબ, મતદાન મોટાભાગે શાંતિપૂર્ણ રહ્યું હતું, પરંતુ કેટલીક ઘટનાઓએ ચિંતા જગાવી હતી. બે જિલ્લાઓમાં ગ્રેનેડ વિસ્ફોટની ખબરો મળી છે, જ્યારે રાજશાહી-૩ બેઠક પર એક મહિલા સ્વતંત્ર ઉમેદવાર હબીબા બેગમ પર હુમલો થયાના પણ અહેવાલ છે. વરિષ્ઠ ચૂંટણી સચિવ અખ્તર અહેમદે જણાવ્યું કે બપોરે ૨ વાગ્યા સુધીમાં અંદાજે ૪૭.૯૧ ટકા મતદાન નોંધાયું હતું, જે સાંજ સુધીમાં વધવાની શક્યતા છે. કમનસીબે, મતદાન દરમિયાન સ્વાસ્થ્ય સમસ્યાઓને કારણે ચાર લોકોના મોત પણ નિપજ્યા છે.
ગેરરીતિના આક્ષેપો અને વિપક્ષનો વિરોધ
મતદાન પ્રક્રિયા પૂર્ણ થતાની સાથે જ રાજકીય આક્ષેપોનો દોર શરૂ થઈ ગયો છે. બાંગ્લાદેશ જમાત-એ-ઈસ્લામીના નેતૃત્વ હેઠળના ૧૧ પક્ષોના ગઠબંધને ચૂંટણી પંચનો દરવાજો ખટખટાવ્યો છે. તેમણે કુમિલા, શરિયતપુર અને પટુઆખલી જેવા વિસ્તારોમાં મતદાનમાં ગંભીર ગેરરીતિઓ થઈ હોવાનો આરોપ લગાવી ફરીથી મતદાન કરવાની માંગ કરી છે. જોકે, ચૂંટણી પંચે દાવો કર્યો છે કે પરિસ્થિતિ સંપૂર્ણ નિયંત્રણમાં હતી અને ક્યાંય મતદાન અટકાવવામાં આવ્યું નથી.
હવે સૌની નજર પરિણામો પર
મતદાનના ડબ્બાઓ સીલ થયા બાદ હવે રિટર્નિંગ ઓફિસરો દ્વારા પરિણામોના કોષ્ટક તૈયાર કરવામાં આવી રહ્યા છે. મોડી રાત સુધીમાં પ્રાથમિક વલણો આવવાની શરૂઆત થઈ જશે. શેખ હસીનાની ગેરહાજરીમાં બાંગ્લાદેશની જનતા ‘નેશનલ ચાર્ટર’ અને નવા નેતૃત્વને કેટલો આવકારે છે, તેના પર ભારત સહિત સમગ્ર વિશ્વની નજર ટકેલી છે.