કોલકાતા : દેશની સૌથી મોટી કોલસા ઉત્પાદક કંપની 'કોલ ઇન્ડિયા' એ ગુરુવારે બજાર બંધ થયા બાદ તેના ઓક્ટોબર-ડિસેમ્બર (Q3) નાણાકીય પરિણામો જાહેર કર્યા છે. જોકે વાર્ષિક ધોરણે કંપનીના નફા અને આવકમાં થોડો ઘટાડો જોવા મળ્યો છે, પરંતુ આ આંકડા બજારના નિષ્ણાતોની ધારણા કરતા ઘણા સારા રહ્યા છે. સૌથી મહત્વની વાત એ છે કે, કંપનીએ તેના શેરધારકોને ખુશ કરવા માટે વચગાળાના ડિવિડન્ડની પણ જાહેરાત કરી છે.
નાણાકીય વર્ષ ૨૦૨૫-૨૬ના ત્રીજા ક્વાર્ટરમાં કોલ ઇન્ડિયાનો ચોખ્ખો નફો ₹૭,૧૬૬ કરોડ રહ્યો છે. જોકે ગયા વર્ષે આ જ ગાળામાં નફો ₹૮,૪૯૧ કરોડ હતો, પરંતુ CNBC-TV18 ના ₹૬,૮૨૫ કરોડના અંદાજની સામે આ કામગીરી ઘણી પ્રશંસનીય છે. કંપનીની આવક પણ ₹૩૪,૯૨૪ કરોડ નોંધાઈ છે, જે બજારની ₹૩૩,૨૮૮ કરોડની અપેક્ષા કરતા વધુ છે. જોકે, ખર્ચ વધવાને કારણે કંપનીના માર્જિનમાં ઘટાડો જોવા મળ્યો છે જે ૨૬.૭ ટકા પર આવી ગયો છે.
 ₹5.5 પ્રતિ શેરની લ્હાણી: પરિણામોની સાથે કંપનીના બોર્ડ ઓફ ડિરેક્ટર્સે પ્રતિ શેર ₹૫.૫ ના ત્રીજા વચગાળાના ડિવિડન્ડ ને મંજૂરી આપી છે. રોકાણકારો માટે આ સારા સમાચાર છે કારણ કે કંપનીએ આ ડિવિડન્ડ મેળવવા માટે ૧૮ ફેબ્રુઆરી, ૨૦૨૬ ને 'રેકોર્ડ ડેટ' તરીકે નક્કી કરી છે. લાયક શેરધારકોના ખાતામાં આ ડિવિડન્ડની રકમ ૧૩ માર્ચ સુધીમાં જમા થઈ જશે.
 ગુરુવારે કોલ ઇન્ડિયાનો શેર ૧ ટકાના ઘટાડા સાથે ₹૪૧૯ પર બંધ થયો હતો. પરંતુ બજારના અંદાજ કરતા સારા પરિણામો અને ડિવિડન્ડની જાહેરાતને કારણે શુક્રવારના ટ્રેડિંગ સત્રમાં શેરમાં મોટી હિલચાલ જોવા મળી શકે છે. જોકે માર્જિનમાં થયેલો ઘટાડો રોકાણકારો માટે ચિંતાનો વિષય છે, પરંતુ ડિવિડન્ડની આવક તેને સરભર કરી શકે છે.