ખાર્તૂમ (સૂદાન) :વિશ્વની સૌથી લાંબી અને આફ્રિકાની કરોડરજ્જુ ગણાતી નીલ નદીમાં ફરી એકવાર મોટી દુર્ઘટના સર્જાઈ છે. સૂદાનના ઉત્તરી નીલ નદી પ્રાંતમાં એક પેસેન્જર હોડી અચાનક સંતુલન ગુમાવી દેતા પલટી ગઈ હતી. આ હૃદયદ્રાવક અકસ્માતમાં અત્યાર સુધીમાં ૧૫ લોકોના મોતની પુષ્ટિ થઈ છે, જેમાં સૌથી વધુ સંખ્યા નિર્દોષ બાળકો અને મહિલાઓની છે. આ ઘટનાએ સમગ્ર વિસ્તારમાં અરેરાટી મચાવી દીધી છે.
સાક્ષીઓના જણાવ્યા અનુસાર, હોડીમાં કુલ ૨૭ લોકો સવાર હતા. જ્યારે હોડી નદીની બરાબર મધ્યમાં પહોંચી ત્યારે અચાનક તેમાં જોરદાર ધ્રુજારી શરૂ થઈ હતી. મુસાફરો કંઈ સમજે તે પહેલાં જ ગણતરીની સેકન્ડોમાં હોડી ઊંડી નદીમાં પલટી ગઈ હતી. લોકોની બૂમો અને મદદ માટેની પોકારો નદીના મોજામાં દબાઈ ગઈ હતી. સ્થાનિક લોકો અને બચાવ ટીમોએ તાત્કાલિક કામગીરી શરૂ કરી હતી, જેના કારણે ૬ લોકોને મોતના મુખમાંથી બચાવી લેવામાં સફળતા મળી છે.
પ્રાથમિક તપાસમાં બહાર આવ્યું છે કે આ અકસ્માત પાછળ ‘ઓવરલોડિંગ’ મુખ્ય કારણ છે. હોડીની ક્ષમતા કરતા વધુ મુસાફરો તેમાં સવાર હતા. ચોંકાવનારી વાત એ છે કે હોડીમાં એક પણ લાઇફ જેકેટ કે અન્ય કોઈ સુરક્ષા સાધનો ઉપલબ્ધ નહોતા. સૂદાનમાં નદી માર્ગે પરિવહન ખૂબ જ સામાન્ય છે, પરંતુ જર્જરિત હોડીઓ અને નિયમોના ઉલ્લંઘનને કારણે તે હવે ‘મૃત્યુની યાત્રા’ સમાન બની રહ્યું છે.
અંદાજે ૬,૬૫૦ કિલોમીટર લાંબી નીલ નદી સદીઓથી ઈજિપ્ત અને સૂદાન માટે વરદાન રહી છે. પરંતુ તાજેતરના વર્ષોમાં વહીવટીતંત્રની ઉદાસીનતા અને નદી સલામતીના કડક કાયદાના અભાવે આ નદી હવે અકસ્માતોનું કેન્દ્ર બની રહી છે. સ્થાનિક તબીબી સંગઠનોએ સરકાર પાસે આધુનિક બચાવ સાધનો અને નદી પરિવહન માટેના કડક નિયમો બનાવવાની માંગ કરી છે, જેથી ભવિષ્યમાં આવા કરુણ અકસ્માતો અટકાવી શકાય.