ઢાકા: બાંગ્લાદેશની ૧૩મી રાષ્ટ્રીય સંસદની ચૂંટણીમાં ઐતિહાસિક વિજય મેળવ્યા બાદ હવે પાડોશી દેશમાં નવી સરકારની રચનાની તૈયારીઓ તેજ થઈ ગઈ છે. બાંગ્લાદેશ નેશનાલિસ્ટ પાર્ટી (BNP) ના વડા તારિક રહેમાન દેશના નવા વડાપ્રધાન તરીકે શપથ લેવા માટે સજ્જ છે. આ ભવ્ય જીત બાદ ભારત અને બાંગ્લાદેશ વચ્ચેના સંબંધોમાં એક પોઝિટિવ વળાંક જોવા મળ્યો છે, જેમાં પીએમ મોદીના અભિનંદન સંદેશનો BNP એ હાર્દિક આભાર માન્યો છે.
 વડાપ્રધાન મોદીએ સોશિયલ મીડિયા પ્લેટફોર્મ 'X' પર તારિક રહેમાનને પાઠવેલા અભિનંદન બાદ ઢાકામાં રાજકીય ગરમાવો જોવા મળ્યો હતો. પીએમ મોદીએ તેમના સંદેશમાં જણાવ્યું હતું કે, "તારિક રહેમાન સાથે વાત કરીને આનંદ થયો. બંને દેશો વચ્ચેના ઊંડા ઐતિહાસિક અને સાંસ્કૃતિક સંબંધોને ધ્યાનમાં રાખીને ભારત શાંતિ અને પ્રગતિ માટે કટિબદ્ધ છે."
આ સંદેશના જવાબમાં BNP ની ચૂંટણી સંકલન સમિતિના વડા નઝરુલ ઇસ્લામ ખાને કહ્યું કે, "અમે પીએમ મોદીના શબ્દોનું સ્વાગત કરીએ છીએ. અમને વિશ્વાસ છે કે તારિક રહેમાનના નેતૃત્વમાં બંને દેશો અને ત્યાંની જનતા વચ્ચેના સંબંધો વધુ મજબૂત અને ગાઢ બનશે."
આંકડાઓમાં BNP ની જીતનો પંજો: બાંગ્લાદેશની સંસદમાં બહુમતી માટે જરૂરી આંકડાઓને BNP એ પાર કરી લીધા છે:
કુલ બેઠકો: BNP એ એકલા હાથે ૨૦૯ બેઠકો જીતી છે.
સાથી પક્ષો સાથે મળીને આ આંકડો ૨૧૦ને પાર કરી ગયો છે.
આ વિજય સાથે જ અવામી લીગના છેલ્લા બે દાયકાથી ચાલી આવતા વર્ચસ્વનો અંત આવ્યો છે અને બાંગ્લાદેશમાં સત્તા પરિવર્તનની લહેર જોવા મળી છે.
ક્યારે થશે શપથ ગ્રહણ?: સૂત્રોના જણાવ્યા અનુસાર, તારિક રહેમાન આવતીકાલે એટલે કે શનિવારે વડાપ્રધાન તરીકે શપથ લઈ શકે છે. ભારત માટે બાંગ્લાદેશની સ્થિરતા અને સરહદી સુરક્ષા અત્યંત મહત્વની છે, તેથી નવી સરકાર સાથે ભારતના કેવા સંબંધો રહે છે તે જોવું રસપ્રદ રહેશે.
બાંગ્લાદેશના આ નવા રાજકીય પ્રારંભથી દક્ષિણ એશિયાના ભૌગોલિક-રાજકીય સમીકરણોમાં કેવા ફેરફારો આવશે તે પર સમગ્ર વિશ્વની નજર છે.