જૂનાગઢ:  જૂનાગઢના ગિરનારની પાવન તળેટીમાં આયોજિત ભવનાથનો મેળો હવે પૂર્ણ ભક્તિભાવ સાથે ખીલી ઉઠ્યો છે. મહાશિવરાત્રીના પાવન અવસર પૂર્વે અહીં ‘બમ બમ ભોલે’ અને ‘હર હર મહાદેવ’ ના ગુંજારવથી આખું આકાશ અને પહાડો ગુંજી ઉઠ્યા છે. દેશ-વિદેશથી આવેલા લાખો શ્રદ્ધાળુઓ ભવનાથ મહાદેવના શરણમાં નતસમસ્ત થઈ રહ્યા છે, જેના કારણે તળેટીમાં જાણે માનવ મહેરામણ ઉમટ્યું હોય તેવા દ્રશ્યો સર્જાયા છે.
દિગંબર સાધુઓનું આકર્ષણ અને હાઈટેક રસોડા
ભવનાથના મેળાનું મુખ્ય આકર્ષણ એવા નાગા સાધુઓ અને વિભિન્ન અખાડાઓના સાધુ-સંતોના આગમનથી મેળાની રોનક વધી ગઈ છે. ભજન અને ભક્તિની સાથે અહીં ‘ભોજન’નો પણ મહિમા અપરંપાર છે. ખોડિયાર ટ્રસ્ટ જેવા અનેક સેવાભાવી સંગઠનો દ્વારા છેલ્લા ૬૫ વર્ષથી અવિરત સેવા આપવામાં આવી રહી છે. આ વર્ષે હાઈટેક રસોડા દ્વારા હજારો ભક્તોને પ્રસાદ પીરસવામાં આવી રહ્યો છે, જે મેળાની વ્યવસ્થાનું ઉત્તમ ઉદાહરણ પૂરું પાડે છે.
કિર્તીદાન ગઢવીના સુરીલા કંઠે જામી ભક્તિની રંગત
મેળાના સાંસ્કૃતિક સ્ટેજ પર લોકગાયક કિર્તીદાન ગઢવીના સુરીલા કંઠે જ્યારે ‘હર હર મહાદેવ’ના નાદ સાથે લોકસાહિત્ય અને ભજનોની રમઝટ બોલી, ત્યારે હજારો ભક્તો ઝૂમી ઉઠ્યા હતા. ગિરનારની ગુફાઓમાં તપ કરતા સાધુઓ અને બહાર મેદાનમાં ઉમટેલા સંસારીઓ - સૌ કોઈ શિવની આરાધનામાં એકાકાર થઈ ગયા હતા.
VVIP કલ્ચરને તિલાંજલિ
રાજ્ય સરકાર દ્વારા લેવાયેલા મહત્વના નિર્ણય મુજબ, આ વખતે મંદિરોમાં કોઈ VVIP કલ્ચર રાખવામાં આવ્યું નથી. મંત્રી જગદીશ વિશ્વકર્માએ પણ જણાવ્યું છે કે નેતાઓ પણ સામાન્ય ભક્તોની જેમ જ દર્શન કરી રહ્યા છે, જે ભવનાથના મેળાની પવિત્રતામાં વધારો કરે છે.
આગામી મહાશિવરાત્રીની મધ્યરાત્રિએ નીકળનારી શાહી રવેડી અને મૃગી કુંડમાં શાહી સ્નાન સાથે આ મેળાનું સમાપન થશે, પરંતુ અત્યારે તો જૂનાગઢની ભૂમિ શિવમય બનીને ભક્તોને આશીર્વાદ આપી રહી છે.