યુનિક આઈડેન્ટિફિકેશન ઓથોરિટી ઓફ ઈન્ડિયા (યુ.આઈ.ડી.એ.આઈ.) એ આધાર કાર્ડની ડિઝાઈનમાં ધરખમ ફેરફાર કરવાની યોજના બનાવી છે, જે અંતર્ગત સુરક્ષા વધારવા માટે કાર્ડ પરથી વ્યક્તિગત વિગતો હટાવી માત્ર ક્યુ.આર. કોડ રાખવામાં આવશે.

નાગરિકોની ગુપ્તતા અને ડેટા સુરક્ષાને વધુ મજબૂત બનાવવાના હેતુથી યુ.આઈ.ડી.એ.આઈ. દ્વારા આધાર કાર્ડના નવા મોડલ પર કામ કરવામાં આવી રહ્યું છે. નવા આયોજન મુજબ, હવે આધાર કાર્ડ પર નામ, જન્મ તારીખ અથવા સરનામું જેવી સંવેદનશીલ વિગતો ખુલ્લેઆમ છાપવામાં આવશે નહીં. તેના બદલે, કાર્ડ પર માત્ર કાર્ડધારકનો ફોટો અને એક સુરક્ષિત 'ક્યુ.આર. કોડ' હશે. કોઈપણ સત્તાવાર ચકાસણી માટે આ કોડને સ્કેન કરવો પડશે, જેનાથી માત્ર અધિકૃત વ્યક્તિ જ વિગતો જોઈ શકશે.

આ નિર્ણય પાછળનું મુખ્ય કારણ 'ઓળખની ચોરી' અને 'ડેટા લીક' જેવી ઘટનાઓ રોકવાનું છે. ઘણીવાર ઝેરોક્ષ કોપી કે ખોવાયેલા કાર્ડ દ્વારા વિગતોનો દુરુપયોગ થતો હોય છે. નવા ફોર્મેટમાં, ભૌતિક કાર્ડ પર વિગતો ન હોવાથી સુરક્ષાનું એક વધારાનું સ્તર ઉમેરાશે. ડિજિટલ ઈન્ડિયા અંતર્ગત આ એક ક્રાંતિકારી પગલું માનવામાં આવે છે. આગામી સમયમાં નવા નોંધણી કરાવનાર અને જૂના કાર્ડધારકો માટે આ સુવિધા તબક્કાવાર રીતે અમલી બનાવવામાં આવશે. *