કોર્ટિના ડી'એમ્પેઝો (ઇટાલી): ઇટાલીના સુંદર ડોલોમાઇટ્સ પહાડોમાં રમાઈ રહેલી વિન્ટર ઓલિમ્પિક્સમાં રમતગમત કરતા અત્યારે રમતવીરોની 'અંગત પ્રવૃત્તિઓ' વધુ ચર્ચામાં છે. ઓલિમ્પિક વિલેજમાં ખેલાડીઓના સ્વાસ્થ્ય અને સુરક્ષા માટે વહેંચવામાં આવેલા મફત કોન્ડોમનો જંગી જથ્થો માત્ર ૩ જ દિવસમાં ખતમ થઈ જતા આયોજકો અને તબીબી ટીમો આશ્ચર્યમાં મુકાઈ ગઈ છે.
સ્ટોક ખતમ, ખેલાડીઓ પરેશાન!
ઇટાલિયન અખબાર 'લા સ્ટેમ્પા' ના અહેવાલ મુજબ, ઓલિમ્પિક વિલેજમાં રહેતા રમતવીરો માટે રાખવામાં આવેલ સુરક્ષાનો પુરવઠો પળવારમાં ગાયબ થઈ ગયો છે. એક અનામી રમતવીરે પોતાની વ્યથા ઠાલવતા કહ્યું કે, "માત્ર ત્રણ જ દિવસમાં બધું ખતમ થઈ ગયું! તેઓએ અમને નવો સ્ટોક લાવવાનું વચન આપ્યું હતું, પણ કોણ જાણે ક્યારે આવશે." અત્યારે સ્થિતિ એવી છે કે નવા પુરવઠાની રાહ જોઈને ખેલાડીઓ હવે પ્લેસ્ટેશન રમીને પોતાનો સમય વિતાવી રહ્યા છે.
પેરિસ ઓલિમ્પિક્સના રેકોર્ડ તોડ્યા?
પેરિસ ૨૦૨૪ ઉનાળુ ઓલિમ્પિક્સમાં ૩ લાખ કોન્ડોમનું વિતરણ કરવામાં આવ્યું હતું. તેની સરખામણીમાં ઇટાલીની વિન્ટર રમતોમાં રમતવીરોની સંખ્યા ઘણી ઓછી (લગભગ ૨,૮૭૧) હોવાથી આયોજકોએ ૧૦,૦૦૦ થી પણ ઓછો પુરવઠો રાખ્યો હતો. પરંતુ બરફીલી ઠંડી વચ્ચે ખેલાડીઓમાં જોવા મળેલા આ 'ઉત્સાહ' એ તમામ ગણતરીઓ ઊંધી પાડી દીધી છે. ઇટાલીના લોમ્બાર્ડી પ્રદેશના ગવર્નર એટીલિયો ફોન્ટાનાએ સોશિયલ મીડિયા પર સ્પષ્ટતા કરી કે, "આ કોઈ શરમની વાત નથી, ૧૯૮૮ની સિઓલ ઓલિમ્પિક્સથી જ આ એક સ્થાપિત પ્રથા છે."
ગોપનીયતાના નામે 'જુગાડ'
ઓલિમ્પિક વિલેજમાં પ્રાઈવસી એટલે કે એકાંત મળવું મુશ્કેલ હોય છે. રિપોર્ટ્સ મુજબ, મિલાન અને કોર્ટિનામાં રહેતા રમતવીરો હવે 'રિલેક્સેશન રૂમ' (આરામ કક્ષ) નો સહારો લઈ રહ્યા છે. ઝાંખી લાઈટો અને સોફ્ટ મ્યુઝિકવાળા આ રૂમમાં રમતવીરો પોતાની કલ્પનાશક્તિનો ઉપયોગ કરીને એકાંત શોધી રહ્યા છે. સ્પેનિશ ફિગર સ્કેટર ઓલિવિયા સ્માર્ટે પણ ઇન્સ્ટાગ્રામ પર એક વિડિયો શેર કરીને આ મુદ્દે રમૂજ ફેલાવી હતી.
આજે ૧૪ ફેબ્રુઆરી અને વેલેન્ટાઇન ડે હોવાથી આ અછત રમતવીરો માટે વધુ કપરી સાબિત થઈ શકે છે. હવે જોવાનું એ રહેશે કે આયોજકો નવો સ્ટોક ક્યારે પહોંચાડે છે અથવા રમતવીરો ખરેખર રમતો પર ધ્યાન કેન્દ્રિત કરે છે કે નહીં!