નવી દિલ્હી: દક્ષિણ એશિયાના બે પાડોશી દેશો, ભારત અને બાંગ્લાદેશમાં હાલમાં રાજકીય ગરમાવો ચરમસીમાએ છે. એક તરફ બાંગ્લાદેશમાં તારિક રહેમાનના નેતૃત્વમાં નવી સરકાર શપથ લેવા જઈ રહી છે, તો બીજી તરફ ભારત પોતાના સાંસદોના વેતનમાં ૨૪% ના ધરખમ વધારા સાથે નવો ઈતિહાસ લખી રહ્યું છે. સામાન્ય જનતા જ્યારે મોંઘવારી સામે ઝઝૂમી રહી છે, ત્યારે આ 'જનપ્રતિનિધિઓ' ને મળતા લાખોના પગાર અને શાહી સુવિધાઓએ સોશિયલ મીડિયા પર નવી ચર્ચા છેડી છે. તુલનાત્મક રીતે જોઈએ તો, ભારતીય સાંસદોની કમાણી બાંગ્લાદેશી સાંસદો કરતા લગભગ બમણી છે, પરંતુ બાંગ્લાદેશી નેતાઓને મળતી 'કાર ઈમ્પોર્ટ' ની સુવિધા ભારતીયોને પણ ઈર્ષ્યા પજવે તેવી છે.
બાંગ્લાદેશમાં નવા ચૂંટાયેલા સાંસદોને 'સંસદ સભ્યો ઓર્ડર, 1973' મુજબ આશરે રૂ.૧,૨૭,૮૭૨ (ભારતીય રૂપિયામાં) ની માસિક ચુકવણી મળે છે. જેમાં મૂળ પગાર રૂ.૫૫,૦૦૦ ની આસપાસ છે. જોકે, તેમની સૌથી મોટી તાકાત 'ડ્યુટી-ફ્રી' વાહનોની આયાત છે. એક બાંગ્લાદેશી સાંસદ દર પાંચ વર્ષે વિદેશથી કોઈ પણ વૈભવી કાર, જીપ કે માઈક્રોબસ મંગાવી શકે છે, જેના પર તેમણે એક રૂપિયો પણ ટેક્સ કે વેટ ચૂકવવો પડતો નથી. આ સિવાય તેમને સરકારી હોસ્પિટલોમાં મફત સારવાર અને ઓફિસ ખર્ચ માટે પણ અલગથી ભથ્થું આપવામાં આવે છે.
બીજી તરફ, ભારત તેના સાંસદો પર વધુ ઉદાર જણાય છે. ૨૦૨૫-૨૬ ના નવા સુધારા બાદ, ભારતીય સાંસદોનો મૂળ પગાર રૂ.૧,૨૪,૦૦૦ થઈ ગયો છે, જે તમામ ભથ્થાઓ સાથે મળીને રૂ.૨,૮૬,૦૦૦ પ્રતિ માસ સુધી પહોંચે છે. આ આંકડો બાંગ્લાદેશી સાંસદોના કુલ પગાર કરતા ઘણો વધારે છે. ભારતીય સાંસદોને દિલ્હીના લ્યુટિયન્સ ઝોનમાં બંગલો, વાર્ષિક ૫૦,૦૦૦ યુનિટ મફત વીજળી, ૪૦ લાખ લિટર મફત પાણી અને ૩૪ મફત હવાઈ મુસાફરી જેવી સુવિધાઓ મળે છે. નિવૃત્તિ પછી પણ તેમને રૂ.૩૧,૦૦૦ થી શરૂ થતું આજીવન પેન્શન મળે છે, જે સુવિધા બાંગ્લાદેશમાં આટલી વ્યાપક નથી.
આ તુલના દર્શાવે છે કે ભારત તેના વિશાળ અર્થતંત્રને અનુરૂપ પોતાના સાંસદોને ઉચ્ચ જીવનધોરણ પૂરું પાડે છે. જોકે, બંને દેશોમાં એક વાત સમાન છે: જનતાના ટેક્સના પૈસે મળતી આ સુવિધાઓ હંમેશા ટીકાનો વિષય રહી છે. બાંગ્લાદેશમાં નવી સરકારના આગમન સાથે લોકો આશા રાખી રહ્યા છે કે આ સુવિધાઓનો ઉપયોગ લોકકલ્યાણ માટે થશે, જ્યારે ભારતમાં ફુગાવાને ધ્યાનમાં રાખીને કરવામાં આવેલો આ પગાર વધારો મધ્યમ વર્ગમાં ચર્ચાનું કેન્દ્ર બન્યો છે. અંતે, સવાલ એ જ રહે છે કે શું આટલા ઉંચા પગાર બાદ જનતાના પ્રશ્નોનું નિરાકરણ તેટલી જ ઝડપથી આવશે?