નવી દિલ્હી: ભારતીય ચૂંટણી પંચ દ્વારા મતદાર યાદીના સઘન સુધારણા અભિયાનમાં મોટો અવરોધ જોવા મળ્યો છે. ઉત્તર પ્રદેશ, રાજસ્થાન અને મધ્ય પ્રદેશ સહિત દેશના ૧૦ રાજ્યો અને ત્રણ કેન્દ્રશાસિત પ્રદેશો અંતિમ મતદાર યાદી જાહેર કરવાની નિર્ધારિત સમયમર્યાદા ચૂકી ગયા છે. જોકે, લક્ષદ્વીપ અને પુડુચેરીએ શનિવારે પોતાની યાદી જાહેર કરીને બાજી મારી લીધી છે. ગયા વર્ષના ઓક્ટોબર મહિનાથી શરૂ થયેલા આ અભિયાનમાં અંદાજે ૫૧ કરોડ જેટલા મતદારોના ડેટાની ચકાસણી કરવામાં આવી રહી છે, પરંતુ જમીની સ્તરે સંકલનના અભાવે આ પ્રક્રિયા પાછળ ધકેલાઈ ગઈ છે.
૭ ફેબ્રુઆરીની મૂળ ડેડલાઇન વીતી ગયા બાદ હવે રાજ્યોએ નવી તારીખો જાહેર કરવી પડી છે. રાજસ્થાને હવે ૨૧ ફેબ્રુઆરીની નવી તારીખ નક્કી કરી છે, જ્યારે મધ્ય પ્રદેશ ૨૩ ફેબ્રુઆરીએ પોતાની અંતિમ યાદી બહાર પાડે તેવી પ્રબળ શક્યતા છે. વહીવટી વિલંબ અને કેટલાક વિસ્તારોમાં કાનૂની ગૂંચવણોને કારણે આ પ્રક્રિયા ખોરંભે પડી છે. જોકે, પંચ દ્વારા સતત દેખરેખ રાખવામાં આવી રહી છે જેથી આગામી ચૂંટણીઓ પૂર્વે કોઈ પણ પાત્ર મતદાર પોતાનો મતાધિકાર ગુમાવે નહીં.
ટેબલ: રાજ્યવાર નવી સંભવિત તારીખો
| રાજ્ય/કેન્દ્રશાસિત પ્રદેશ | નવી સંભવિત તારીખ
ગુજરાત અને તમિલનાડુ | ૧૭ ફેબ્રુઆરી |
 આંદામાન, કેરળ, છત્તીસગઢ, ગોવા | ૨૧ ફેબ્રુઆરી |
પશ્ચિમ બંગાળ | ૨૮ ફેબ્રુઆરી |
 ઉત્તર પ્રદેશ | ૧૦ એપ્રિલ સુધી (ચાલુ રહેશે)
સૌથી વધુ ચિંતાજનક સ્થિતિ ઉત્તર પ્રદેશમાં છે, જ્યાં મતદારોની સંખ્યા વિશાળ હોવાથી આ પ્રક્રિયા ૧૦ એપ્રિલ સુધી લંબાવવામાં આવી છે. આ સમયગાળા દરમિયાન મોટી સંખ્યામાં નવા યુવા મતદારોના નામ ઉમેરવામાં આવશે અને મૃત કે સ્થળાંતર કરી ગયેલા લોકોના નામ યાદીમાંથી દૂર કરવામાં આવશે. ગુજરાત માટે રાહતના સમાચાર એ છે કે ૧૭ ફેબ્રુઆરીએ રાજ્યની સુધારેલી યાદી જાહેર થઈ શકે છે. યાદીમાં થતા આ ફેરફારો પર તમામ રાજકીય પક્ષોની પેની નજર છે, કારણ કે નવા મતદારોની સંખ્યા અને ભૌગોલિક ફેરફારો તેમની આગામી ચૂંટણી વ્યૂહરચનામાં મોટો ભાગ ભજવે છે.
મતદાર યાદી જાહેર થવામાં થતો આ વિલંબ રાજકીય ગલિયારાઓમાં ચર્ચાનો વિષય બન્યો છે. પક્ષોને ભય છે કે યાદી વહેલી જાહેર ન થવાથી તેમને બૂથ લેવલના આયોજનમાં મુશ્કેલી પડી શકે છે. બીજી તરફ, ચૂંટણી પંચ ખાતરી આપી રહ્યું છે કે ડેટાની ચોકસાઈ માટે આ સમય લેવો અનિવાર્ય છે. હવે ફેબ્રુઆરીનો અંતિમ સપ્તાહ દેશના મોટાભાગના રાજ્યો માટે નિર્ણાયક રહેશે, જ્યારે કરોડો નાગરિકોને ખબર પડશે કે તેમનું નામ લોકશાહીના આ પવિત્ર ચોપડામાં અંકિત છે કે નહીં.