​વિશ્વના સૌથી ધનિક વ્યક્તિ અને ટેક ઉદ્યોગસાહસિક ઈલોન મસ્ક તેમના સોશિયલ મીડિયા પ્લેટફોર્મ 'એક્સ' (અગાઉનું ટ્વિટર) ને માત્ર વિચાર વ્યક્ત કરવાના માધ્યમ સુધી સીમિત રાખવા માંગતા નથી. પ્રાપ્ત વિગતો મુજબ, 'એક્સ' હવે તેના ૧ અબજ (૧ બિલિયન) યુઝર્સ માટે એપની અંદર જ સ્ટોક (શેરબજાર) અને ક્રિપ્ટોકરન્સીના ટ્રેડિંગની સુવિધા શરૂ કરવાની યોજના બનાવી રહ્યું છે.

​મસ્કનું સપનું 'એક્સ'ને એક 'એવરીથિંગ એપ' બનાવવાનું છે, જ્યાં યુઝર્સ સમાચાર વાંચવા, સોશિયલ નેટવર્કિંગ, પેમેન્ટ્સ અને હવે રોકાણ પણ એક જ જગ્યાએ કરી શકે. આ સુવિધા શરૂ થતા જ પરંપરાગત બ્રોકિંગ ફર્મ્સ અને ટ્રેડિંગ એપ્લિકેશન્સને મોટો ફટકો પડી શકે છે. આ માટે 'એક્સ' દ્વારા નાણાકીય સેવા પ્રદાતાઓ સાથે ભાગીદારી કરવામાં આવી શકે છે.

​જો આ યોજના સફળ થાય, તો સોશિયલ મીડિયા અને ફાઈનાન્સનું આ સૌથી મોટું એકીકરણ હશે. યુઝર્સ રિયલ ટાઈમ માર્કેટ અપડેટ્સ જોતાની સાથે જ શેર કે ક્રિપ્ટોની ખરીદ-વેચાણ કરી શકશે. જોકે, આ માટે વિવિધ દેશોના નિયમનકારી તંત્રો (રેગ્યુલેટર્સ) ની મંજૂરી મેળવવી મસ્ક માટે મોટો પડકાર બની રહેશે. ટેક અને ફાયનાન્સ જગતમાં આ સમાચારને લઈને ભારે ઉત્સુકતા જોવા મળી રહી છે.