ઉજ્જૈન:મધ્યપ્રદેશના ધાર્મિક નગર ઉજ્જૈનમાં 'વંદે માતરમ' ગાવાના સરકારી આદેશને લઈને એક મોટો વિવાદ ઊભો થયો છે. કેન્દ્ર સરકાર દ્વારા શાળાઓ અને સરકારી કચેરીઓમાં રાષ્ટ્રગીત અને 'વંદે માતરમ' ફરજિયાત બનાવ્યા બાદ, ઉજ્જૈનના ઇમામ મુફ્તી સૈયદ નાસિર અલી નદવીએ તેનો ખુલ્લેઆમ વિરોધ કર્યો છે. મુફ્તીએ આ આદેશને ઇસ્લામિક માન્યતાઓ વિરુદ્ધ ગણાવતા કહ્યું છે કે મુસ્લિમો માટે અલ્લાહ સિવાય અન્ય કોઈની પૂજા કરવી એ સૌથી મોટું પાપ છે, પછી ભલે તે માતૃભૂમિ કેમ ન હોય.

મુફ્તી નદવીએ પત્રકારો સાથેની વાતચીતમાં કડક વલણ અપનાવતા જણાવ્યું કે, ભારત એક લોકશાહી દેશ છે જ્યાં બંધારણે દરેકને ધાર્મિક સ્વતંત્રતા આપી છે. ઇસ્લામના મૂળ સિદ્ધાંતો મુજબ 'એકેશ્વરવાદ' સર્વોપરી છે. વંદે માતરમમાં ધરતીની પૂજાનો ભાવ છે, જે મુસ્લિમો માટે અશક્ય છે. તેમણે તો ત્યાં સુધી ચીમકી આપી દીધી છે કે જો કોઈ શિક્ષણ સંસ્થામાં વંદે માતરમ ફરજિયાત કરવામાં આવશે, તો મુસ્લિમ સમાજ પોતાના બાળકોને ત્યાં ભણવા માટે નહીં મોકલે. તેમના મતે, મક્કા-મદીનાની ધરતી હોય કે ભારતની, પૂજા માત્ર એક ઈશ્વરની જ થઈ શકે.

આ નિવેદન બાદ સોશિયલ મીડિયા અને રાજકીય વર્તુળોમાં તીખી પ્રતિક્રિયાઓ જોવા મળી રહી છે. એક પક્ષ આને ધાર્મિક સ્વતંત્રતાનો મામલો ગણાવી રહ્યો છે, જ્યારે બીજો પક્ષ આને રાષ્ટ્રભક્તિ અને દેશના કાયદાના અપમાન તરીકે જોઈ રહ્યો છે. મુફ્તીએ ભારપૂર્વક કહ્યું કે સરકાર પોતાના નિર્ણયો કોઈ ચોક્કસ સમુદાય પર લાદી શકે નહીં. હવે જોવાનું એ રહેશે કે પ્રશાસન અને સરકાર આ મામલે કેવું વલણ અપનાવે છે, પરંતુ હાલમાં તો આ નિવેદને ઉજ્જૈન સહિત સમગ્ર રાજ્યમાં ચર્ચાની એરણે ચડાવ્યું છે.