મુંબઈ:  મહારાષ્ટ્ર એન્ટી ટેરરિઝમ સ્ક્વોડ એ રાજ્યમાં આતંકવાદી ગતિવિધિઓને ડામવા માટે એક મોટું અને ગુપ્ત ઓપરેશન હાથ ધર્યું છે. ગુપ્તચર એજન્સીઓ પાસેથી મળેલી ચોક્કસ બાતમીના આધારે, ATS એ મધરાતે યવતમાળ અને અહિલ્યાનગર જિલ્લાઓમાં એકસાથે ૨૧ સ્થળોએ દરોડા પાડ્યા હતા. આ કાર્યવાહીમાં ૧૪ જેટલા શંકાસ્પદ યુવાનોની અટકાયત કરવામાં આવી છે, જેઓ આતંકવાદી સંગઠનોના સંપર્કમાં હોવાની અને રાજ્યમાં કોઈ મોટી અઘટિત ઘટનાને અંજામ આપવાની તૈયારી કરી રહ્યા હોવાની આશંકા છે. આ ઓપરેશન એટલું ગુપ્ત રાખવામાં આવ્યું હતું કે સ્થાનિક સ્તરે પણ તેની ગંધ આવવા દીધી નહોતી.

તપાસ દરમિયાન બહાર આવ્યું છે કે, આતંકવાદી સંગઠનો સોશિયલ મીડિયા અને અન્ય માધ્યમો દ્વારા સ્થાનિક યુવાનોનું કટ્ટરપંથીકરણ કરી રહ્યા હતા. ATS એ યવતમાળના પુસાદ અને ઉમરખેડમાં ૧૪ સ્થળોએ અને અહિલ્યાનગરમાં ૭ સ્થળોએ સર્ચ ઓપરેશન હાથ ધરીને અનેક મોબાઈલ ફોન, લેપટોપ, પેનડ્રાઈવ અને શંકાસ્પદ દસ્તાવેજો જપ્ત કર્યા છે. અધિકારીઓના જણાવ્યા અનુસાર, જપ્ત કરાયેલા ઇલેક્ટ્રોનિક ઉપકરણોમાં આતંકવાદી પ્રવૃત્તિઓ માટેના સંપર્કો અને આયોજન અંગેના મહત્વના પુરાવા મળી શકે છે. હાલમાં તમામ શંકાસ્પદોની અજ્ઞાત સ્થળે સઘન પૂછપરછ કરવામાં આવી રહી છે.

મહારાષ્ટ્ર પોલીસ અને ATS ની આ સંયુક્ત કાર્યવાહીથી સમગ્ર રાજ્યમાં સનસનાટી મચી ગઈ છે. જોકે, હજુ સુધી આ મામલે કોઈ સત્તાવાર ધરપકડ કરવામાં આવી નથી, પરંતુ સૂત્રોના જણાવ્યા અનુસાર પુરાવાઓના આધારે ટૂંક સમયમાં મોટી ધરપકડ થઈ શકે છે. પોલીસ સીસીટીવી ફૂટેજ અને શંકાસ્પદોના બેંક ટ્રાન્ઝેક્શનની પણ તપાસ કરી રહી છે જેથી આ આતંકી નેટવર્કના મૂળ સુધી પહોંચી શકાય. સુરક્ષા એજન્સીઓ અત્યારે એ તપાસી રહી છે કે આ યુવાનોને ફંડિંગ ક્યાંથી મળતું હતું અને તેમના વિદેશી આકાઓ કોણ છે.