ભવિષ્યની ટેકનોલોજી વિશે વાત કરતા પ્રધાનમંત્રી નરેન્દ્ર મોદીએ જણાવ્યું છે કે ભારત આર્ટિફિશિયલ ઈન્ટેલિજન્સ અને ડેટા સેન્ટર્સ માટે વિશ્વનું મુખ્ય કેન્દ્ર બનવા સજ્જ છે. વિકસિત ભારતના વિઝનને સાકાર કરવા માટે ખાનગી ક્ષેત્રે આધુનિક ટેકનોલોજીમાં મોટું રોકાણ કરવું પડશે. મોદીએ કહ્યું કે ભારત પાસે યુવા પ્રતિભા અને વિશાળ ડેટાનો ભંડાર છે, જે આર્ટિફિશિયલ ઈન્ટેલિજન્સના વિકાસ માટે પાયાની જરૂરિયાત છે. સરકાર આ માટે જરૂરી નીતિગત માળખું અને પ્રોત્સાહન પૂરું પાડવા માટે પ્રતિબદ્ધ છે.

પ્રધાનમંત્રીએ ડેટા સુરક્ષા અને સંગ્રહના મહત્વ પર ભાર મુકતા કહ્યું કે ભારત પોતાની સરહદોની અંદર ડેટા સ્ટોરેજની ક્ષમતા વધારી રહ્યું છે. ડેટા સેન્ટર્સના નિર્માણથી દેશમાં રોજગારીની નવી તકો ઉભી થશે અને ટેકનોલોજી ક્ષેત્રે આત્મનિર્ભરતા આવશે. તેમણે ઉદ્યોગપતિઓને વિનંતી કરી કે તેઓ આ ઉભરતા ક્ષેત્રોમાં આગળ આવે અને ભારતને વિશ્વનું ટેક ફેક્ટરી બનાવે. આર્ટિફિશિયલ ઈન્ટેલિજન્સનો ઉપયોગ ખેતી, શિક્ષણ અને આરોગ્ય જેવા ક્ષેત્રોમાં કરીને સામાન્ય નાગરિકના જીવનમાં સકારાત્મક બદલાવ લાવવાનું સરકારનું લક્ષ્ય છે.