દેશભરમાં મહાશિવરાત્રીના પર્વની હર્ષોલ્લાસ સાથે ઉજવણી કરવામાં આવી રહી છે. ૧૨ જ્યોતિર્લિંગ સહિત દેશના તમામ નાના-મોટા શિવાલયોમાં વહેલી સવારથી જ ભક્તોની ભારે ભીડ જોવા મળી રહી છે. ઉજ્જૈનના વિશ્વ પ્રસિદ્ધ મહાકાલેશ્વર મંદિરમાં ભગવાન મહાકાલને ૧૧ ફૂટનો ભવ્ય સેહરો પહેરાવવામાં આવ્યો હતો, જે ભક્તો માટે આકર્ષણનું કેન્દ્ર બન્યો હતો. ભસ્મ આરતીમાં હજારો શ્રદ્ધાળુઓએ ભાગ લઈ ધન્યતા અનુભવી હતી.

બીજી તરફ, વારાણસીના કાશી વિશ્વનાથ મંદિરમાં પણ અભૂતપૂર્વ ઉત્સાહ જોવા મળ્યો હતો. ભગવાન શિવના દર્શન કરવા માટે ભક્તોની ૫ કિલોમીટર લાંબી લાઈનો લાગી હતી. વહીવટીતંત્ર દ્વારા ભક્તોની સુવિધા માટે ખાસ વ્યવસ્થા કરવામાં આવી હતી, છતાં શ્રદ્ધાળુઓનો ધસારો એટલો હતો કે આખું શહેર શિવમય બની ગયું હતું. હર હર મહાદેવના નાદથી વાતાવરણ ગુંજી ઉઠ્યું હતું. ભક્તોએ ગંગા સ્નાન કરી બાબા વિશ્વનાથ પર જલાભિષેક કર્યો હતો.

સોમનાથથી લઈને રામેશ્વરમ સુધીના તમામ મંદિરોમાં વિશેષ પૂજા-અર્ચના અને રુદ્રાભિષેકના આયોજનો કરવામાં આવ્યા છે. ભક્તો શિવની આરાધનામાં લીન જોવા મળ્યા હતા. અનેક સ્થળોએ ભવ્ય શિવ શોભાયાત્રાઓ કાઢવામાં આવી હતી, જેમાં હજારો લોકો જોડાયા હતા. સુરક્ષા વ્યવસ્થાને ધ્યાનમાં રાખીને પોલીસ અને સ્થાનિક તંત્ર દ્વારા ચુસ્ત બંદોબસ્ત ગોઠવવામાં આવ્યો હતો જેથી ભક્તો શાંતિપૂર્ણ રીતે દર્શન કરી શકે.