બેંગકોક, તા.16: વિશ્વભરના પ્રવાસીઓના મનપસંદ પર્યટન સ્થળ એવા થાઈલેન્ડે પ્રવાસન ક્ષેત્રે ક્રાંતિકારી ફેરફારોની જાહેરાત કરી છે. થાઈ સરકાર દ્વારા પ્રવાસન અને અર્થતંત્રને વેગ આપવા માટે નવા વિઝા નિયમો લાગુ કરવામાં આવ્યા છે, જે ભારતીયો સહિત 93 દેશોના નાગરિકો માટે ખૂબ જ ફાયદાકારક સાબિત થશે. હવે મુસાફરો કોઈપણ જટિલ વિઝા પ્રક્રિયા વગર થાઈલેન્ડમાં પૂરા 60 દિવસ સુધી રોકાણ કરી શકશે, જે પહેલાં ખૂબ જ મર્યાદિત હતું.
થાઈલેન્ડના વડાપ્રધાન કાર્યાલયના પ્રવક્તાએ જણાવ્યું હતું કે, આ નવી નીતિનો મુખ્ય હેતુ પ્રવાસીઓને પડતી મુશ્કેલીઓ ઘટાડવાનો અને દેશમાં લાંબા ગાળાના રોકાણને પ્રોત્સાહન આપવાનો છે. ખાસ કરીને જે લોકો રજાઓ ગાળવા માંગે છે અથવા બિઝનેસ માટે ટૂંકી મુલાકાતે આવવા માંગે છે, તેમને હવે એડવાન્સ વિઝા લેવાની કથામાંથી મુક્તિ મળશે.
ડિજિટલ કામદારો અને વિદ્યાર્થીઓ માટે વિશેષ સુવિધા
આધુનિક સમયની જરૂરિયાતોને ધ્યાનમાં રાખીને થાઈલેન્ડે 'ડેસ્ટિનેશન થાઈલેન્ડ વિઝા' લોન્ચ કર્યો છે. આ વિઝા ખાસ કરીને એવા 'ડિજિટલ નોમાડ્સ' (Remote Workers) માટે છે જેઓ દરિયાકિનારે બેસીને પોતાનું ઓનલાઈન કામ કરવા માંગતા હોય. આ ઉપરાંત, વિદેશી વિદ્યાર્થીઓ માટે 'નોન-ઇમિગ્રન્ટ ED પ્લસ' વિઝા પણ રજૂ કરાયા છે, જેના દ્વારા તેઓ અભ્યાસની સાથે-સાથે પાર્ટ-ટાઈમ કામ પણ કરી શકશે.
હવે કાગળની ઝંઝટ ખતમ: 'ડિજિટલ આગમન કાર્ડ' શરૂ
પ્રવાસીઓનો અનુભવ સુધારવા માટે જૂની પેપર સિસ્ટમ દૂર કરીને TM.6 ઓનલાઈન સિસ્ટમ (થાઈલેન્ડ ડિજિટલ આગમન કાર્ડ) અમલમાં મૂકવામાં આવી છે. 1 મે, 2025 થી આ સિસ્ટમ કાર્યરત છે, જેના કારણે એરપોર્ટ પર લાંબી કતારોમાં ઉભા રહેવાની જરૂર નહીં પડે. મુસાફરો ઘરે બેઠા જ પોતાની માહિતી ઓનલાઈન ભરી શકશે, જેનાથી એરપોર્ટ પર ચેક-ઇન પ્રક્રિયા ખૂબ જ ઝડપી બનશે.
પરિવારો માટે કેમ છે શ્રેષ્ઠ પસંદગી?
થાઈલેન્ડ માત્ર તેની સુંદરતા માટે જ નહીં, પણ સસ્તું પરિવહન, શ્રેષ્ઠ હોસ્પિટાલિટી અને પરિવારના તમામ સભ્યો માટે ઉપલબ્ધ વિવિધ પ્રવૃત્તિઓને કારણે એશિયાનું નંબર વન ફેમિલી ડેસ્ટિનેશન બની રહ્યું છે. નવા નિયમો બાદ હવે ભારતીય પરિવારો માટે થાઈલેન્ડમાં વેકેશન મનાવવું વધુ આર્થિક અને તણાવમુક્ત બનશે.