બેંગલુરુ, તા.16: કર્ણાટકની રાજધાની બેંગલુરુમાંથી એક સ્તબ્ધ કરી દે તેવી ઘટના સામે આવી છે, જ્યાં બીજા બાળકના આગમનની ખુશીમાં કરાવાયેલું ફોટોશૂટ એક પરિવાર માટે ક્યારેય ન ભૂલી શકાય તેવો સદમો બની ગયું છે. 8 મહિનાની ગર્ભવતી સ્વાતિ જ્યારે તેના મેટરનિટી ફોટોશૂટમાં વ્યસ્ત હતી, ત્યારે તેનો 3 વર્ષનો પુત્ર લક્ષ્મીર રમતા-રમતા નજીકમાં આવેલા પાણીના કુંડ (પુલ) માં પડી ગયો હતો. કમનસીબે, ત્યાં હાજર કોઈ પણ વ્યક્તિનું ધ્યાન બાળક પર ગયું નહીં અને માસૂમનું ડૂબી જવાથી મૃત્યુ થયું.
ફોટોશૂટની તૈયારીઓ વચ્ચે સર્જાયો કાળમુખો અકસ્માત
મળતી માહિતી મુજબ, સ્વાતિ તેના બીજા બાળકના જન્મને યાદગાર બનાવવા માટે શનિવારે એક પ્રોફેશનલ ફોટોશૂટ કરાવી રહી હતી. આ આયોજન પાણીના કુંડની નજીક રાખવામાં આવ્યું હતું. ફોટોગ્રાફીના લાઈટિંગ અને પોઝ આપવાની પ્રક્રિયા દરમિયાન નાનો લક્ષ્મીર નજીકમાં જ રમી રહ્યો હતો. અચાનક પગ લપસવાને કારણે તે ઉંડા પાણીમાં પડી ગયો હતો. જ્યારે લોકોનું ધ્યાન ગયું ત્યારે ઘણું મોડું થઈ ચૂક્યું હતું. બાળકને તાત્કાલિક હોસ્પિટલ ખસેડવામાં આવ્યો, પરંતુ તબીબોએ તેને મૃત જાહેર કર્યો હતો.
પિતા વિદેશમાં હતા, પુત્રના મોતના સમાચાર મળતા જ દોડી આવ્યા
આ ઘટના વધુ કરૂણ ત્યારે બની જ્યારે જાણવા મળ્યું કે બાળકના પિતા ચરણ કામ અર્થે વિદેશ ગયા હતા. તેઓ પોતાના પરિવારમાં નવા સભ્યના સ્વાગત માટે ઉત્સાહિત હતા, પરંતુ તેમને મળેલા આ માઠા સમાચારથી આખો પરિવાર ભાંગી પડ્યો છે. પિતા આજે બેંગલુરુ પરત ફરે તેવી શક્યતા છે, ત્યારબાદ બાળકની અંતિમ વિધિ કરવામાં આવશે.
પોલીસ તપાસ: શું આ બેદરકારી હતી?
સ્થાનિક પોલીસે આ મામલે અકસ્માતે મોતે ગુનો નોંધી તપાસ શરૂ કરી છે. પોલીસ એ પાસા પર તપાસ કરી રહી છે કે શું ફોટોશૂટના આયોજકો અથવા ત્યાં હાજર સ્ટાફ દ્વારા સુરક્ષાના નિયમોમાં કોઈ બેદરકારી દાખવવામાં આવી હતી? જે સ્થળે આટલી ગંભીર ઘટના બની ત્યાં બાળકો માટે કોઈ ફેન્સિંગ કે સુરક્ષા કવચ હતું કે નહીં, તે અંગે પણ સવાલો ઉઠી રહ્યા છે.